|
I. - LA SORTIE.
Allons, Madlon, Mollé, Collette,
Dêpêchous don, j'nos en allons:
Là! assiévous sus la banquette;
Je serons tard si je n'filons.
Côlin, ouest qu'est frouque et faucille?
Sont-i pliéchies dans le tcheriot?
Fait nous du run, Madlon, ma fille,
Afin que j'monte, et bouoge un miot.
Y-a-t-i du cidre dans la jougue,
Et des galettes dans l'pagni?
Par ioù irons-je, ou par la Hougue,
Ou par la route du magni?
Vite en hernais, garçons, fillettes;
En vrais vraitcheurs, houras! partons.
J'pouorrons brûler deux-treis billettes
Pour nos r'sequir quand je r'veindrons.
II. - SUS L'ROQUI.
Vite en travas, garçons et filles,
A tig' de corps, à flieur de bras;
En bouons vraitcheurs, jouons des faucilles;
Copons le vrai, houras! houras!
J'en érons-ti de ches êchouées,
Nou peut en ramasser un tas
Seit pour engrais ou pour des fouées;
Copons le vrai, houras! houras!
Dêpêchons nous, car la marée
Monte dêjà, je crei, là bas;
La pêque en s'ra bétôt parée;
Copons le vrai, houras! houras!
Vite en travas, garçons et filles,
A tig' de corps, à flieur de bras;
En bouons vraitcheurs, jouons des faucilles;
Copons le vrai, houras! houras!
III. - LA R'VÉNUE.
Nos v'la r'venus, ah, ma Jeann'ton,
Bouors nous de l'iaue, fait nous du feu;
Je sis mouoilli comme un hann'ton;
Un 'té portrait en as tu veu?
Madlon, apporte nous, ma fille,
Touos les bênnits et les vlicots;
Il y en a tant qu'la pouque en trille:
J'en pouorrons faire des fricots.
Et tel qu'est sèque, ma Pernelle,
Va nos cherchir nos fauçillons;
I sont là bas souos la tonnelle;
Et r'veint ramasser nos haillons.
Côlin s'en va tumbrer sa cherge,
Pis i r'veindra soignir ses ch'vaux;
Tu iras cherchir ses hardes d'serge,
Car il est trempé jusqu'ès os.
AU COIN DE L' ATRE.
I fait freid, je crei qui gèle,
J'ai l'onglli au but des deights;
Vein t'en vite, ma Pernelle,
Sus l'feu tape accouo du boués.
Q'nou-s-est bein auprès de s'n âtre
Assis près de sa fouée d'vrai;
Quand nou-s-en d'veindrait cadâtre,
Nou-s-en s'rait-i êtonné?
Ai du cidre et nos le verse
Dans l'malzard auprès du feu;
Prénds-y garde, tu-en renverse;
Tu di nen, mais j'en ai veu.
Chein qu'est perdu, ma hardelle,
Personne en ont-i du bein?
Tout p'tit miot, miette, ou brédelle,
Faut sauver et n'perdre rein.
Qu'estqui fait que l'tchean d'la sorte
Wace comme un enragi? -
Ch'n'est personne - r'clios la porte,
Devr'ai nou-s-a peux d'bouogi.
Si la freid nos continue,
Tout s'ra blianc de nei demain;
Ou nos est sitôt venue,
Q'nou la sent pus, ch'est certain.
Au chein qui fait v'nin la fouaille
I faut être r'connaissants:
I-en a bein, hélas! j't'enshaille
Qui sont forchis d'être sans.
|
