J'fus divèrsément întérêssi dans l'articl'ye entouor la vraiqu'sie tchi fut publiée dans la gâzette du sé à ches drein auve les bieaux portraits dé hèrnais et d'vraitcheurs du temps pâssé.
Par chance, j'avais 'té justément dans la bibliothèque à chèrchi dans les vielles gâzettes datant d's années trente pouor d's histouaithes et articl'yes en Jèrriais et j'avais trouvais d's annonces pouor des pièches dé thiâtre en Jèrriais présentées par la dgaîngue tch'avait nom “L's'Enfuntchis”. L'nom dé chutte clobe d'acteurs est rapp'lé par la Coupe des Enfuntchis tch'est présentée ès cheins tchi présentent la miyeu pièche ès Séthées Jèrriaises d'l'Eisteddfod.
“L's'Enfuntchis” v'naient d'l'Êst d'l'Île - v'là tch'est mouontré par lus nom car ch'est l'mênom traditionnel des cheins d'Grouville et d'St. Cliément.
Les Grouvillais et St. Cliémentais soulaient êt' des grands vraitcheurs et i' soulait brûler l'vrai à seule fîn d'faithe sèrvi les chendres ou les vendre ès fèrmièrs d'aut's Pâraîsses. I' faut înmaginner qu'i' y'avait tant d'ches fouées et tant d'feunmée dans ches deux Pâraîsses qu'nou dithait qu'St. Cliément et Grouville 'taient enfuntchis.
Nou sait bein étout qué s'nou-s'est enfuntchi, nou n'a pon grand'chose dans l'chèrvé. Mais les cheins tchi vraitchaient avaient cèrtainment fait du bein pouor les clios, pouor l'envithonnment et pouor l'êconomie. I' n'taient pon sans doute aussi enfuntchis qu'i' pathaîssaient!
Havo!
2003
Viyiz étout: