Yiavet eunne vieille femme qui n'tet pas trop bein
Le Docteu yiordonnit de prendre eun bouan bain
Et coumme où n'iétet pas trop habitueai
Où n'avait pas toutes ses qu'moditeais.

Probabiément qu'jamais n'avait veu eun bain
Et où n'sçavait pas comme chonna est sain
Car quand où tet p'tite sa pouore vieille mèthe
Les lavet tous dans la chauedjièthe.

Yia desja t'chique anneais qu'où n'avait pas d'mèthe
Et t'chet ditto quand à la chauedjièthe,
Toute suite où pense à san saleuex
Qu'où gardait tréjous sçouos l'drécheuex.

Où pensit à sa terreine après
Et vite où l'a descend d'sus l'ais
A toute minute où'l attendait san bouan houmme
Quand où crie Hélas!! ne v'la la kioche qui soune.

Chute bouanne femme ichein gardet eunne boutique
Tchesque ne v'la qu'arrive yieunne de ses pratiques
La pouore vieille l'y contit s'ein embarras
Et l'aoutre l'y dis ouè-qu'est touos vos grands piads?

J'étais à ramassé la terreine à mourue
Quand j'vos ai entendu sonner à lus
La femme l'y dis si où vouleais m'la dounné
J'men vais éprouvé à vos lavé.

La bouanne femme dis "ce n'est pas lavé qui faut
C'est de me mettre toute entière dans l'eau,
Elle a été remplie de poisson"
Qui était ma foi! excessivement bon.

Chute femme ichein yieaidji à se mettre dedans
Mais oh!! malheur où'l oublie de mettre yieau devant
Achteu t'chi faithe où n'pouvait pas prendre eun bain sans yieau
Et l'Docteu yiavet dit qui fallait qu'oùl preinse bein kaoud.

Mais mon doux! coumment faithe n'où n'pouvait pas en versé
Y fallet attendre pour le bouan homme à arrivé,
Quand il entrit y d'mandit pour sa Marie
La femme l'y dis, veneais la vais je vos en prie.

Quand le vieux la vit, il y dis, mais Marie lève té
Et où l'y dis j'en peux pas Godfroi aide mé
Ou'l êprouvet et êprouvet sus touos les sens
Mais où restet tréjous enfonceai dedans.

San bouan homme se trouvit dans eun grand embarras
Et faisait de grands cris en levant ses bras
Disant dépottais; dépottais; ma chère Marie
J'ein sais pas qu'oi faire venez vite je vous en prie.

Eun vaiszein arrivit quand il entendit les cris
Et aiedjit au bouan homme à d'zenpotté Marie,
Yieun hallet sus la terreine et l'aoutre sus ses pids
Et parveinrent à la fein à d'zenpotté Marie.

S'n'homme tet tout content d'ervais sa Marie
Où-qu'o eunne aoutre fais sus ses pids,
La terreine en était toute cratchïyie
Mais jamais de bain n'erprendra Marie.

Georgie