|
À londgeu d'âges, j'y veins d'amors à cliav'ter au haut dg'ieau, raîque mé et man cruchot, la mé fricache et frîngue. J'connais la traiche ès honmards, où'est qu'i' tunmb'sent et tchaquenardent en freûlant l's êtchés du bord d'La Corbiéthe (j'ai à m'taithe) ou d'La Froutchie ou du Grouët. Haînitcheurs, il' ôsent entrer dans l'ôsyi, les beinv'nus dans mes cliavieaux auve lus pouettes et pînchettes, lus bliues babinnes. S'i' n'y'a ni feunque ni feunme, j'èrbète et r'brousse quémîn au P'tit Port. Dé iou qué j'sis mâté à la barre j'hale tout l'hâvre d'eune halenée - du sablion puchi dans un bèr dé grannit. Des fanmil'yes d'valent pouor lus thée, des galettes à vrai, des beurrées, des potées dé g'lée. J'vis eune fais un coupl'ye à mangi d'l'êtchuîvée à même lé pot, péthe et fis, sans faithe dé teurts, Lé vent m'soûffl'ye des clius d'caqu'téthie: As-tu bein patchi l'sé? Où'est qu'il est, man costeunme? Gare à tes g'nouors sus les pèrrons! J'pâsse eune danme à nagi des tours d'un rotchi, eune mauve et deux pies mathannes au dget. La mé ichîn l'tou est graîssie d'vrai aboulé d'l'Atlantique. Atout mes dés ès bênacl'yes jé câtouôle l'ieau, tchi pouor la preunmié fais ch't' année m'caûffe. |
Alice Allen
Vèrsion Jèrriaise dé Geraint Jennings
Viyiz étout: