|
L'Comité des Finances Rôde ichin coumme un loup: Pour payer les Dêpenses Il est restè sans l'sou! Avec un Juge en tête (Moussieu Duret-Aubin) I' veint de s'mettre en quête Pour trouver tchic hèrpin. Ah! Coumitè d'Minzéthe, T'ch'est, don', qu'tu f'thas bétôt? R'va t'en dans ta tâniéthe Et laisse le monde en r'pos! De r'chus, une racachie Et d'comptes, un bouan lopin, I' y'en veint par achie! Mais d'sous? Pas un benin! Y'un des trais Counnêtabl'yes Suggéthe un grand “show” d'flieurs, Et dit qu'ch'est profitabl'ye Dans l'temps des Visiteurs! Ah! Coumitè d'Minzéthe, T'ch'est, don', qu'tu f'thas bétôt? R'va t'en dans ta tâniéthe Et laisse le monde en r'pos! L'Juge Payn, l'Révérend Luce, Pour le temps sont d'accord: Mais à tchi sert l'astuce Quand les hèrpins sont hors? Le Trésor est bein vièdde Qu'était aut'fais si rond, Mais y'où trouver le r'mièdde Qui produitha des fonds? Ah! Coumitè d'Minzéthe, T'ch'est, don', qu'tu f'thas bétôt? R'va t'en dans ta tâniéthe Et laisse le monde en r'pos! Moussieu Bouais, chutte bordée, N'trouve rien à “rapporter” Sa vouaix n'n'est d's'accordèe Quand i' l'is faut l'avouer! Moussieu L'Mèrquand, li-même, Qu'a 'tè à Chicâgo, Trouve que l'cas est extrême Et chèrche en vain l'magot! Ah! Coumitè d'Minzéthe, T'ch'est, don', qu'tu f'thas bétôt? R'va t'en dans ta tâniéthe Et laisse le monde en r'pos! L'ex-Trésôri êprouve Et pense à tigue-de-corps Mais autchun d'ses plians n'prouve Et d'fatigue, i' s'endort! Enfin, chatchun d'sa carre I' cherfouollent de lus mus S'disant qu'faute d'or en barre Che s'sa “la cliè souos l'us!” Ah! Coumitè d'Minzéthe, T'ch'est, don', qu'tu f'thas bétôt? R'va t'en dans ta tâniéthe Et laisse le monde en r'pos! Je riais, j'veurs bein l'admettre, D'l'embarras d'ches médghans. J'pensais qu'i' s'n'allaient mettre Un impôt sus d'autre gens! Je m'fiais sus tchic maniéthe D'en êviter l'paiement - Sinon p'têtre sus la biéthe Et j'en ai bein rarement! Ah! Coumitè d'Minzéthe, T'ch'est, don', qu'tu f'thas bétôt? R'va t'en dans ta tâniéthe Et laisse le monde en r'pos! Mais tch'est qu'i' s'imaginent De taxer, dites, ach'teu, Pour me faire changi d'mine Et plieuther d'mal au tchoeu! La pouorre p'tite cigarette! Le thée! le p'tun!! le s'no!!! Ma minséthe est compliète J'm'en vais vivre à Bréco! Ah! Coumitè d'Minzéthe, T'ch'est, don', qu'tu f'thas bétôt? R'va t'en dans ta tâniéthe Et laisse le monde en r'pos!
Elie |
Viyiz étout: