Les Pages Jèrriaises

Notre Nouviau Surveillant

Une maintchi Catolic, l'autre Méthodiste
Et le reste Anglican, n'en v'la une liste
De pus d'une sorte, car quant à ses réligions,
Je le garantis de sonnai bain à tuous les sons;
Y peut souffié le frai et y peut souffié le cau,
Et tuounnai le bian de s'n'yi au bézoin s'il le faut;
Y peut joindre ses mains et se mettre à genours,
Car ov tant de réligions, yen a pour en déhors;
Il est membre de classe et séquestre des Augrès,
Y fétha san travas et itha à l' Eghise après.
Chest bain seux qu'i'l est bon, je vos mais tuous au défi
D'en trouvai un miheu, pour t'nin et êcorchi;
Y vos fétha des biaux-biaux, votre dos est i tuounnai,
Dans deux minutes ou s'êtes à maintchi dèchithai.

Ne v'la chain que nou dit en passant,
Quant à notre nouviau Surveillant,
Mait' Philip Jean De Sainte-Croix,
Qui fut nommai la s'maine passaie
Avec une voix d'mâjorité;
Ch'tai Mousieu Nicol', l' ex-Député;
Il avait promins qu'in vot'tai pon,
Y vins à changhi son opinion;

Ch'tai Mousieu Le Vesconte qui réussi,
Sans biaucou d'peine, son opinion à changhi,
Il avait un fort arghument, y disait, "mais
"Quant y s'agit de nommai, faut soigni es intéthais."
"Je n'ai pas bézoin de vos l'dithe, car ou savais bain,
"Yen à quant y sont en pièche, y n'arrêtent pour rain."

Quand n'ou me l'dis, je dis vethghia ma fé,
VENANT D'LI, v'la qui vaut la peine de conservé,

Car san soin des intéthais a tai tel,
Qu'il en a fait, un fait tout personnel,
Car y sont oquo, au buoun jour qu'il est,
Dans l'fond d'la pouchette de ses brais.

Alfred Messervy

 

Viyiz étout:

 

Les Pages Jèrriaises