Dame oui ! nou l'vé sans pain',
Qué l'île est pienn' d'abus;
Qu'ya eun' band' qui nos mèn'nt
Et nos chuch'nt en sangsu's . . . .
Dé nos ouvri l'abêm'
Nou les vé tréjoux prêts;
Oui ! i nos mèn'nt èt ruèn'nt
Car ch'est lus intérêt !
Pouôr' moutons dé Jerriais,
Ou l'viyis bain qué trop,
La belle achie d'décrets
Qui vont tchais sus vot' co :
Car bain des piéch's dé vous
Qui tchitèz vot' patrie,
Pour s'êcapé des loups,
Fillèz en Australie.
Coum' touots les insouciants
Qu'ou laissiz drièr' vous,
Pûtôt qu'êt' rêsistants,
Lé couorag' manque à tous . . . .
Ou bouchis vos oyrell's
Quand les dévoués vos cri'nt :
"A l'oeuvr' séïs fidèl's
"Et prennèz nos avis !"
Bouan vent à cheux qui fill'nt,
Mais quant ès chains qui rest'nt,
Faut les purgi d'lus bil' -
Lus êvité la pest' ;
I march'nt, chés insouciants -
Lé précipice est là,
Chés aveugl's vont tchais d'dans
Si j'n'les empêchons pas ! . . . .
Jé sis chergi dé m'mètr'
En travers dé chu creux,
Pour montré à chés pètr's
Qué j'travâyons pour yeux,
Et qué, quandi qu'i dorm'nt,
Jé soum's touôts dans not' grang'
A lus fair' des 'rform's
Qui les mètraient des ang's !
Jé vains don cârêment -
Car l'heur' des 'Rform's est v'nue, -
Ov' lé médicament,
'Rmèd' des loués et abus.
Alons ! vous qu'êt's estropiès
Et presqu'à la minzèr',
D'ruèn' voul'-ous êt's sauvès ?
Range-ous souos not' bânièr' !
J.D.R.
St.-Sauveux 1853 - 54.
| 