J'ai veu Jêri menait à tour de rôle,
Par les Durell, Anlait et Duhamé,
Pie les Godfray, pie le Sueux, pie Nicolle.
Je cré qu'acheteu que ch'est Potiquéré,
Qui mene tout et condit à sa guise,
Et fait allé tout le monde à san grait,
Les gens de Cour comme les gens d'Eglise.
J'en ai ti veu depie que je siès nait?

J'ai veu bâti à la Davissonnie,
Un grand châté pour enfreumé les fos;
Yeza du reun pour une racachie.
En faudra-ti, hélas, de chès touozots,
Si nou s'en va enfreumé tout laiduze
Et tout amice à l' esprit biscaziait?
Yun de chès jours nou zen fait l'ouvertuze.
J'en ai ti v eu depie que je siè s nait?

J'ai veu souvent des gens qui dans les rues,
Disent du ma des membres des Etats,
Criant qui sont comme un tas de tortues:
Y craient marchi mais y n'avanchent pas.
Si andrait mé quicun oze le dize,
Je li reponds, ou zête un affrontait;
De vous, man bé, le monde s'en va rize.
J'en ai ti veu depie que je siès nait?

J'ai veu des gens, chercheurs de patronnage,
Qui vont partout faisant du quand-a-moué,
Corbins portant de biaux pans le plumage.
Y sont trop grands pour des Jerriais, ma fé!
Pie y sent vont bailli de lue varvette,
Et raconté tout le bain qui zont fait;
Y zen ont fait, mais ch'est à tue pouchette.
J'en ai ti veu depie que je siès nait?

J'ai veu souvent la vertu en chiquette,
Et le fripon habilli de fin dra;
J'ai veu aitout bain pue d'une mazette,
Qui se criait quique chose d'extra.
L'homme sensait se dit en le viyant:
Chonna se crait être pue haut montait
Que Messervy sue le haut du Mont-Bliancq.
J'en ai ti veu depie que je siès nait?

Pie j'en ai veu quand y vont par les qumins,
Etre si fiers qui s' en vont se rgardant;
L' orgui les fait se creze bain malins,
Y faut les vais allé sauticottant,
Et pue de yun qui marchait à chapade,
Au temps qui va, se crait un haut bottait;
De vais chonna, j'en siès presque malade.
J'en ai ti veu depie que je siès nait?

Enfin j'ai veu. Mais la bouonne nouvelle,
Que nou m'apprend, nou za taxait les tchians;
Avouons tous que la reforme est belle,
Et trais hourras pour nos representants.
Je vos en prie, Messieurs, tandis qu'ou ziètes,
Si ou voulais votre ervenu doubliait,
Dans les Etats taxais toutes les bêtes.
J'en ai ti veu depie que je siès nait?

L' ANMIN FLIPPE.