Y'avait eune fais un raîté tch'avait fait san siez-sé dans eune parqu'thie, où'est qu'i' d'meuthait acanté sa nichie dé p'tchiots. Un jour i' lus en fûtent, li et la bouonnefemme, tcheûter un fricot pouor lus p'tits raît'lîns, en laîssant lé p'tit ouaîth'lîn à lus tout seu.
Auprès eune pause, lé v'là lé p'pèe raîté d'èrtou siez li.
"Mais tchi dgiâtre qué j'avons ichîn?" qu'i' fit. "Y'a-t-i' ieu tchique dro? Ous avez ieu, à chein tch'i' pathaît, les sangs touônnés, mes moussetchets."
"P'pèe!" qu'i' fîtent, "un grand ouéthou a justément pâssé par-ichîn. Tchil êffrit'tie! Il êpyit dans not' nid atout ses grands ièrs! V'là tchi nos touônnit les sangs!"
"Bein," qu'i' fit. "Par ioù qu'il allit?"
"I' s'en fut par chu bord-là!"
"Attendez-mé ichîn, mes p'tits," dit l'péthe raîté. "J'm'en vais lî fichi eune cliamûse qu'la muthâle lî'en fich'cha eune aut'! N'vos gênez d'aut', mes p'tchiots. J'm'en vais l'gaffer." Épis i' s'en fut souôtre lé dêmon.
I' touônnit la carre et viyit un lion à marchi, mais l'raîté n'avait pon d'peux. I' jutchit là sus l'dos au lion et lî gronnit coumme chennechîn: "Tchi dgiâtre qué tu t'crai qu'tu veins siez mé à man nid à touônner les sangs à mes mousses?"
L'lion n'êcoutit pon l'raîté et allit pus liain sus lé c'mîn.
V'là tchi fit l'raîté acouo pus mârri, et i' c'menchit à dgeuler au lion. "Manniéthe dé peûle à v'nîn paûtchi d'même dans man nid! S'tu r'veins," qu'i' fit, "tu'éthas à en payi chi! Jé n'veurs pon t'bailli la pataouärre qu'tu méthite," qu'i' dit en l'vant ieune d'ses pattes, "mais j'té bûch'chais l'héthèque du dos dans un clyîn dg'yi!"
Et chenna dit, i' volit d'èrtou siez lî.
"N'vos gênez d'aut', mes p'tits chièrs," qu'i' fit. "J'l'ai lichonné, dgia. I' n'èrveindra d'aut'"
Viyiz étout: