|
J'avons eune p'tite rouoge-gorge siez nous, J'la dgette souvent aller et v'nîn A san nid; muchi dans l'llieru, Sus l'fôssé au bas d'not gardîn. S'ou la vêrrêtes! Coumme oulle est grosse! Mais vraiment ch'la n'mé ravie pas, J'n'ai janmais veu tel appétit Dans un ouaisé - ou' mange tout l'temps! Ou' veint dans l'bel en d'hors d'la porte, Et pathais saver l'heuthe des r'pas. J'li mets des miettes sus l'auge d'la pompe, Hors de la vaie des cats et tchians. Pépée dit qu'ch'est eune affrontée - Ou' n'la tchitte pas s'il est a foui - Et qu's'ou mange touos les vèrs qu'ou happe, Ch'est bein seux qu'ou s'en va mouothi. Pépée n'sait dgeèthe ou'est qu'tout ch'la va! Mais j'sais bein, me; j'ai dêcouvert! J'êpyis dans l'nid et j'vis les p'tits Qu'attendaient là lé bé ouvert! Les préchains jours j'èspéthe de vaie, Jutchis sus l'no a l'heuthe des r'pas: Bav'thettes erlisant au sole - , Ma p'tite rouoge-gorge, et ses êfants! Vèrsion modèrnîsée: J'avons eune p'tite rouoge-gorge siez nous, J'la dgette souvent aller et v'nîn À san nid; muchi dans l'lierru, Sus l'fôssé au bas d'not' gardîn. S'ou la vèrrêtes! Coumme oulle est grôsse! Mais vraiment ch'la n'mé ravit pas, J'n'ai janmais veu tel appétit Dans un ouaîsé - ou mange tout l'temps! Ou veint dans l'bel en d'hors d'la porte, Et pathaît saver l'heuthe des r'pas. J'lî mets des miettes sus l'auge d'la pompe, Hors dé la vaie des cats et tchians. Pépée dit qu'ch'est eune affrontée - Ou n'la tchitte pas s'il est à foui - Et qu's'ou mange touos les vèrs qu'ou happe, Ch'est bein seux qu'ou s'en va mouothi. Pépée n'sait dgéthe ou'est qu'tout ch'la va! Mais j'sai bein, mé; j'ai dêcouvèrt! J'êpyie dans l'nid et j'vis les p'tits Tch'attendaient là, lé bé ouvèrt! Les préchains jours j'espéthe dé vaie, Jutchis sus l'no à l'heuthe des r'pas: Bav'thettes èrlisantes au solé - , Ma p'tite rouoge-gorge, et ses êfants! |
Viyiz étout: