Moussieu l'Editeu
J'ai tait si malade de mârisson d'pis l'c'mench'ment d'la semaine que j'ai ben d'la peine t'nin ma pliume, mais j'ai dit Ph'lip à matin tchi fallait absolûment que j'vos d'mandisse s'ou pouvez nos dithe la raison pour l'insulte que j'avons chu d'ches mêssieux responsablyes pour l's'arrangements Jeudi.
Comme ou pouvez craithe, Moussieu, quand l'brit couothit tchi s'n'allait y'avé d's'invitâtions, j'nos contâimes seux d'être parmi les gens tch'éthaient l'pliaisi d'châtchi d'main auvec la Duchêsse.
Auprès tout je n'sommes pas d'la p'tite bièthe ou du peltas. Comme ou savez, man Ph'lip éthait tait Officyi d'Connêtablye eune bordée s'il avait yeu assez d'sou pour accaté les deus-trais viauds tchi taient ocquo sus l'marchi. Et m'n'onclye Bram éthait sans doute tait Seurveillant s'y n'avait pas attrapé un mais d'prison pour avé assomé sa femme, tch'y l'méthitait ben, auvec un manche de brînge.
Pour c'menchi nos prepathâthions, j'assis l'Ph'lip dans eune tchaise et j'l'y copit les g'veux avec eune pathe de cisiaux qu'non fait servi dans l'gardin. Epis me v'la à haut pour viédgi m's'armouéthes et mes titheurs pour vais tchêsque j'pouôrrais mettre pour convaincre la Duchêsse qu'oulle avait affaithe à des gens d'qualité. Et j'dis à Ph'lip de dèshallé sa nèthe câsaque et ses bouonnes brais et d'lûs baillyi un bouon coup d'brînge.
Vèthe, mais quand l'papi vint l'préchain matin et que j'vit la liste des personnes tch'avaient tait invitées, ah, mais damme, ch'tait eune difféthant affaithe. J'la liut quatre fais d'siète chutte list pour me faithe seûze que j'n'avais pas fait d'mâprînze, épis j'flianque la gâzette à la tête au Ph'lip, et, “R'garde chenna!” j'l'y dit. Et me v'la sus l'plianchais tout man long.
Quand j'me trouvit mûs, j'me mint à considéthé, et j'pensit à me-même que p't'être j'avais tait bête, car sans doute y'avait tchique trompe. Mais nouffé, ch'tait la même histouéthe le préchain jour et j'vint à vais que ch'tait fini, et que j'n'avions autchune espéthance d'ètre parmi les grands gens ès Etats, à la Cour, ou même au Vier Châté.
Moussieu, ch'est abominablye. Tchêsque j'avons fait pour méthité chenna? Tchêsque ils ont contre nous pour nos traité comme si j'tiomes du commun monde? Dites-mé, si vos pliait, car y faut que j'sache. Je n'peux pas allé vos vais car le choe ma tchais dans les gambes, et si chenna continue, y m'faudra d's'êcaches.
Mais y'a eune chose. Je m'sommes pas Saint-Ouennais pour rein, le Ph'lip et me , et j'n'allons pas r'oublié chu biau compliement qu'nou nos a fait. Quand y r'veindra d'la Royauté en Jêrri et qu'nos messieux voudront nos faithe allé les rencontré et l's'invité à v'nin bèthe du thée siez nous, j'lûs freum'thai la porte au nez. Quand y s'mett'raient à g'nors, ils éthont la même raîponse, épis ben seûx. Car chutte fais j's'y mârrie.
MERRIENNE
16/6/1948
Viyiz étout: