Viyiz étout:
Au Portinfé,
Jeudi, sûs l'tard.
Moussieu l'Editeu,
La bouonnefemme, après avé bâillyi d'sa bèque toute la séthée, veint d'ramonté et don j'ai l'occâsion d'm'assièthe pour vos êcrithe. J'peux prendre man temps, car de chutte chaleu ichin ou n'se d's'habille pas dans chinq minutes, la Merrienne. Ch'n'est pas pour dithe qu'oulle a pûs à hallé, car je s'y prèsque seux qu'ou s'est dêfaite d'ocquo un autre cotillion ou deux, mais y'a des choses..., enfin, Moussieu, ous êtes un homme mathié étout, et j'n'ai pas besoin d'en dithe pûs long.
Quant à mé, je n's'y pas prêssi d'me mettre au liet, car j's'y prèsque seux que j'n'éthai pas d'sommé. Pour explitchi, après qu'j'avions dîné, j'ai dit a la bouonnefemme que j'm'en allais donné un couplye d'heuthes dans mes navets, mais la chaleu dans la matinée m'avait êpuisé et pour me r'pôsé un mio j'me s'y couochi le long du fôssi, ouèsque la Merrienne ne pouvait pas m'vais à travers les f'nêtres de la tchuîsine. J'me contais bein à l'abri de tout ma là, mais il est v'nu un maufait vêpre tchi m'a piqui drait sûs l'but du néz, et dans mains d'chinq minutes il avait tant enfié que j'tais prèsque mêconnaissablye. La Merrienne s'est minse à rithe quand j'ai rentré pour un r'miède et ou m'dit que si l'but d'man néz n'avait pas 'tait si rouoge, le vêpre ne l'éthait pas print pour une frâise. Chein qu'nous a des femmes!
Assêsé, Moussieu, j'avons paslé de plusieurs choses. La Merrienne a qu'menchi par me d'mandé si j'criyais que l's'Etats adoptethaient un projét fixant une limite de vitésse pour les moteurs de trente milles à l'heuthe dans toutes les parties d'l'île. Oulle a ajouôté que che s'sait une raide bouonne chose, mais qu'oulle n'viyait pas comment qu'la police pouôrrait l'enforchi. “Y faudrait hardi pûs d'chais policemans en uniforme,” oulle a dit, “et j'en avons dêjà trop; au mains douze Chantgniers par pâraisse de campagne, des Officiers du Connêtablye sans nombre, et en ville y faudrait trais ou quatre Magistrats d'extra à la P'tite Cour, et ocquo!”
“Vèthe, Merrienne,” j'ai dit, “et ocquo..., mais n'te gène pas. Chutte louai-là n'est pas ocquo passée d'un biau but. Quant à tan fils, le Bram, que j'ai veu à matin, y riditchule l'idée compliétement. Y dis qu'nou pouôrrait aussi bein allé au pas; y dit tch'il a souvent d'vallé l'Mont d'Biaumont avec san bidet pûs vite que chonna, et qu'pour une gagaille il îthai pûs vite boulant une chivièthe.”
“Sans doute,” ou s'est faite, “mais combain d'fais tch'il a 'tait d'vant l'Chantgni pour avé cachi trop vite? Et n'oublie pas la bordée tch'il êtrav'lit la vieille vaque à san vaisin tchi 'tait bétôt à terme.”
“Il a tréjous dit que ch'tait la faute à la vaque, tch'y n'éthait pas deu s'méttre à la vaie,” j'ai obsérvé, mais la Merrienne a châtchi la tête. “Y s'trouv'tha en bouaite yun d'chais jours, chu garçon-là,” oulle a dit, “et quand chonna s'arriv'tha y n'faut pas tch'y s'attende que j'îthai l'y porté tchiquechose dans une P'tite bouteille, comme sa soeur, la Jane, faisait à s'n'homme quand il en eut pour une tchinzaine d'jours pour avé supposémment insulté un Chantgni, et pourtant y n'l'y dit qu'la véthité.”
J'ai r'mertchi, Moussieu, tch'y faut être bein r'gardants quand nou dit la véthité à un Chantgni et ocquo bein pûs quand ch'est une affaithe d'un Député. Un Officyi du Connêtablye n'est pas si pièthe, car bein souvent nous en sait tant contre san caractèthe que quand nou s'mârrie et l'y dit éxectement tchèsqu'il est, nou l'y fait peux. Avec chonna, y faut vos dithe que la Merrienne objécte hardi à l'inclûsion des Députés dans la liste, sinon, bein seux, les siens d'la ville.
J'avons pâslé d'la Bataille de Flieurs et, à qu'menchi, la Merrienne a voulu savé ouêsqu'ils ont trouvé ch't'objét-là nommé Frankie. “Nou veur dithe,” ou s'est faite, “que les hardélles s'êvanissent en l'viyant, et chonna m'êtonne pas, mais quant à mé, si un patheil individu avait tâchi de m'faithe la cârre quand j'tais jeune fille il éthait attrapé une paffe tchi y éthait bétôt dislotchi la mâchouaithe. Et la Bella va pûs lien, car ou dit qu'ou l'éthait r'chu avec une hache ou même une bigorne.”
“Vèthe, mais bouonnefemme,” j'y'ai dit, “chonna ch'tait dans les bouons viers temps.”
“Hélas!” oulle a dit, “ouèsque y sont hors, chais jours-là?”
Ph'lip
1959