Moussieu l'Editeu,
Au moment, Moussieu, me v'la dans la tchuîsine, assis dans ma grand'tchaise aupi d'un feu d'bouais, et enfliubé dans ma grand'câsaque et ma cravatte. Ou comprendrez par chonna que je n'me trouve pas trop bein, mais j'ai d'l'encre et du papi, et j'm'en vais tachi d'vos êcrithe comme de couôtume. Si y'a des mots qu'ou n'pouvez pas dêchifré, ou comprendrez que ch'ne s'sa pas d'ma faute.
Pour vos dithe, j'ai une suée d'fraid, j'ai mal-à-la-tête, j'ai des rhoumatices dans les gambes, et m's'ortets sont prèsque paralîsés. Et touos chais mots parsque hier, contre l'avis d'ma Merrienne, j'm'en fut au Show d'la Ville, et je r'vint trempé jusqu'à la pé.
La bouonnefemme avait yeu l'intention de v'nin étout, mais quand ou vit l'temps dans les huit heuthes, ou n'en aimit pas l'appathence, et m'dit qu'ou n's'en allait pas dêhallé. Et j'te donne un avis, Ph'lip, ou dit d'résté ichin étout, car ch'est seux et cértain que j'avons d'iau.
J'ai tait mouoillyi d'vant, j'l'y dit, et j's'y ocquo en vie. Ch'est l'dérnié Show d'l'année, et j'veur le vais. Avec chonna, le temps n'pathait pas tant pièthe et y pouôrrait s'comporté.
J'fut rapporté par un bouon vaisin tch'y vit que j'tais dans un triste êtat, et quand la Merrienne me vit, ou s'fit tout-d'suite. Là, je t'l'avais dit. La préchaine fais p't'être que tu m'êcout'tas.
Les femmes sont d'même, Moussieu, et l'homme intélligent n'dit rain, mais tchiquefais y pense hardi. Enfin m'ayant aidgi à hallé mes souliers et ma casaque, la Merrienne me fit une tâsse de tais et s'assit d'l'autre bord du feu pour me d'mandé tchèsqu'y s'était arrivé. Oulle éthait fait mûs Moussieu, de m'donné un bouon vêrre de grog et d'm'envié au liet.
Ou voulit savé à qu'menchi, si san couôsin Richardson avait gâgni l'championnat des vaques, et quand j'l'y dit tch'y n'avait qu'fait rêserve, ou fit des r'mèrques au sujet des Juges que je n'voudrais pas vais dans vôtre si-réspectablye gâzette. J'n'eut biau l'y dithe qu'ou n'avait veu autchune bête, n'ayant pas tait à même yun des Shows; oulle insistit qu'les Juges qu'avaient fait une patheille bêtise éthaient tait bein mûs siez yeux a plianté d'la caboche. Et quant à té, sorte d'bachouard, ou continuit, est'che que tu n'pouvais pas t'méttre à l'abri au lieu d'résté aupi du ring quand la plyie vint? Absolûment, Ph'lip, tu n'as pas pûs d'avis qu'une môque. Même les poules ichin n'ont pas bouogi du poulâillyi.
Chonna est tout bein bouon, Merrienne, j'l'y dit, mais quand j'vais à un Show, ch'est pour vais les bêtes et nou n'peut pas faithe chonna si nou n'apprèche pas du ring. Et comment que j'pouôrrais crititchi les Juges et lûs dithe ouèsqu'ils ont fait des mêprinses si j'me méttais à l'abri avec la dgaingue tch'aimaient mûs vais les bouteilles que les bśux?
La Merrienne dit qu'au mains j'éthais peut prendre un parapluie, mais tout d'un coup la v'là tch'y change de sujét. La Louisa est v'nue ch't'arlevée, ou qu'menchit, et m'a d'mandé si j'avais ouï du dérnié scandale ichin à Saint-Ou.
Et, je m'fit, tu y'as dit sans doute de taithe sa béque, car tu n'voulais pas entendre de patheilles histouaithes?
Nouffé, ou s'fit, car j'aime tréjous à savé chein tchi s'pâsse dans la pâraisse. Y pathait que---
J'l'intérrompit. Asséz, Merrienne, j'l'y dit, je n'veur pas en ouï une pathole.
Y'a deux hommes tch'y dév'thaient savé mûs, et une femme, tch'en sait dêjà bein trop, et ch'est ---
J'me l'vit, Moussieu et j'm'en fut m'couochi. Mais bein seux la Merrienne n'a pas fini.
Ph'lip.
1956
Viyiz étout: