Mess Bisson, un jour, du parapet
Qu'est tout au haut de la Chronique,
Vit un pigeon, pouorre êdgéthè,
Volant ov' un air famélique

Dans l's'envithons du Vièr Marchi.

Houmme paisibl'ye et plien d'compassion,
Vite, i' lis pitchi deux-trais miettes...
L'pigeon, avec un compagnon,
Ervint là deux-trais jours de siètte,

Dans l's'envithons du Vièr Marchi.

Deux pigeons nouorris coumme chounna
N'montrethaient pon d'ingratitude...
Mess Bisson s'abusait à ch'la;
I' les soignait par habitude,

Dans l's'envithons du Vièr Marchi.

Oui, mais bétôt, quand vint l'êté,
Les pigeons s'mindrent a faithe famille...
Et Mess Bisson, d'san parapet,
Lus env'yait des miettes 'nu coumme grille

Dans l's'envithons du Vièr Marchi.

Un an s'passi. L'êté suivant,
L'tou' d'la Cour, y'avait d'la vol'lie,
Car les p'tits pigeons dev'nus grands
Nichaient dans l'haut d'la machon'nie

Dans l's'envithons du Vièr Marchi.

Et, hier matin, le deux d'Juillet,
Deux Moussieux... dignes fonctionnaithes,
(Faut cachi lus identitè)
Le long d'la Cour pâlaient d'affaithes,
Quand y'un des pigeons d'Mess Bisson,
- Une "pigeonne" pustôt, faut-i' craithe -
Qu'était en état d'pounison,
Mantchi san nid sus la côtiéthe,
Et l'oeu, tout d'un coup, s'êcrâsi,
La cruque en mille morcieaux minchie,
L'jaune et l'bianc (au goût "de-r'vas-y")
Ecliatchant partout en achie...
Ah! fallait vaie, dans un clyin d'yi,
Combein vite qu'un bouan fonctionnaithe
Peut prendre un chapé et l'torchi
Tandis qu'un pigeon r'garde faithe...

Dans l's'envithons du Vièr Marchi.

 
Elie