|
Les paîssons? Bah, tchi reintchivâles! I' n'sont qu'des laiduthes en êcâles. Lé j'va d'mé n'va pon au galop, Et landrinne coumme la crabe à co. La pèrche est pièrcheuse et n'veurt pon Saûticoter auve lé saumon. Pouortchi pâler du gris mulet, Tch'est un paîsson sans întéthêt? La vie est aîsie pouor la brème; Sans ji, sans travas, sans problième. I' vaut mus îngnorer l'manchot Tch'est riditchule et n'fait pon trop. Lé baîni s'cliute à san rotchi; La mouothue mouothitha d'enn'yie. Les hîtres ouaîthives né tchit'tont dgéthe Lé confort dé lus hîtriéthe. I' n'faut pon disteurber l'maqu'thé; I' veurt tréjous rester au liet. Nou n'trouv'tha janmais des anchouais; I' sont à ronflier souos lé vrai. Nou chèrche en vaine pouor les sardinnes, Patchies en confort dans lus tinnes. Lé jean doré dort toute la niet, La matinnée et l'arlévée. Les andgulles, tout coumme les ormèrs, R'posent lus têtes sus lus ouothilièrs. Lé dauphîn s'cârre bein hors d'la vaie; Lé pourpais dort.... coumme un pourpais. Nou-s'èrmèrque aîsiment lé vra, Viyant qu'il est en pyjamas. La truite? N'en v'là-t-i' un îngnot, Tout coumme lé cheurque et lé v'licot! Lé lîn est laid; la pliaie n'pliaît pon; Il en est d'même pouor lé lanchon. La carpe, lé fliêtan et l'orfi; Nou dithait bein qu'i' n'valent pon chi. La grôsse chèrvette et lé héthan; J'les enviêthais au tchu au tchian. Lé bar? La flyînte? L'êtaile dé mé? Belle dêbâte! J'en ai ieu assez!
Geraint Jennings
|
J'lius eune poésie Angliaîche auve lé titre “The Water Zoo” par Evoe (E.V. Knox), un auteu qu'j'aime bein, et i' m'vînt à l'idée d'êcrithe eune sorte dé rêponse.
Viyiz étout: