S'ou sentez l'odeu' d'main, en passant souôs nos f'nètres - ch'est d's ormers. J'en accati un cabot Sam'di - des Jerriais. Pètchis souos la Pulente par un houmme qui s'ait man bieau-frèthe sinon qu'ma soeu l'trouvait trop èslindji. J'en payi un èstchu seul'ment : et j'sis pour r'touôné l's èscalles ; y'a un marchand d'guano qui l's accate chi pour les cliutté sus l'portico d'un cottage qu'il est a faithe bâti a La Rocque pour allé y passé les Dinmanches quand i' f'tha bé.
Ch'est pour not' diné de d'main, a ma fille et mé, ov des poummes-de-terre. Et y'étha des domplinnes après et un gobin d'fromage qu'j'accati bouan marchi Sam'di passé, viyant qui r'muait. Sitot rentré siez nous, j'le couli dans un saucepan et j'mint bin vite eunne brique sus l'couérclye. Il est là oquo, et rin n'a bouogi sinon que l'couérclye se souolève parfais coumme si y'avait tchiq'chose a mitounné d'dans.
J'ai idée qu'nos ormers éthont du gout : et j'conte que v'la tchi s'en va être tendre coumme d'la mouélle. J'avons prins toutes les precautions : Lonore et mé avons travaillyi bin d's heuthes désus. Ch'fut mé qui les èscalli avec eunne pathe de cisieaux a Laizé. J'passi l'pus bé d'la matinée d'Lundi a les lavé. J'vos les scrobbi, lavi, rinchi : rinchi, scrobbi, lavi, dans assez d'ieau et d'soda pour se bannié d'dans. J'm'ettais mins a la qu'minze, bras r'troussés, braies r'troussées, et un vier gris fro a Laizé coumme d'vanté. J'les lavi a grand ieau, et Lonore se plaignit qu'j'avais èscliatchi toute la vaisselle sus l'drecheux. Si chutte fille là n'amende, ou vindra rouâblieuse coumme sa chiéthe méthe qu'est au liet - sus du grué.
Eunne fais bin lavés, i' s'agissait d'bin les battre. Y'a du monde qui battent lus ormers ov eunne mailloche, d'autres avec le dos d'eunne bringe a dents, d'autres avec la palette a tcherbon, et j'counnais un St. Pierrais qui prétend qu'i' n'y'a pas devent l'steam-roller. Mé, j'les batti ov eunne s'melle d'un pètcheux. “Tchui contre tchui, qu'i' m'avait dit, n'y'a pas miyeu.” Ch'est-tan-tchi, j'mint mes bottes, Lonore mint eunne pathe de chabots, j'èstendimes l's ormers sus l'aithe de la tchuizinne : et nos v'la a sauté d'sus a pis joints, qu'la sueu en rouôlait. Après avé travaillyi d'sus pour un coupye d'heuthes, j'bumes du tée, pour en r'avé eunne bordée d'vant que d'nos couochi ; et pis, Mardi matin, j'lus en ballyi oquo eunne bordée tandi qu'Lonore 'tait a grée l'dèsjeunné. Après cheunna, j'agni l'fricot ov un râté, j'le mint dans eunne traisie d'ieau et j'les ouatchinni longtemps ov un g'nèts. M'n' idée est que che s'a eunne mouelle !
La préchenne chose a faithe a ch't'heu, ch'est d'fricachi du gras lard - du lard nouôri sus du gliand, s'nou peut - et eunne tête ou deux d'héthan pour dounné un p'tit gout de r'vas'y. Et pis, quand tout s'a bin roussi, nous les èstuiv'tha a p'tit feu, ov oquo du lard, yeunne ou deux poules, du timbre, du pérsi, eunne démié fielle de louothi, eunne carotte et eunne boutelle ou deux d'Oxo - et l'cook d'un hotel m'a dit que s'nou veurt, nou peut y'ajouôté eunne démié boutelle d'Madère.
J'n'avons pon invité persounne a diné pour chu jour la. Ma femme est au liet - sus du grué ; et Lonore a l's ésprits bas d'avé 'té jouée par chu pend'loque la d'l'autre jour. Mais i'n'en couôta rin d'en v'nin senti l'parfum souos nos f'nètres.
PITEUR PAIN
27/2/1913
Viyiz étout: