Y'a tchiques années, j'tais dans man gardîn eune séthée d'êté. I' faisait néthe niet sans leune ni nouages, mais tout d'un co, vers l'nord j' vis eune manniéthe d'lueu. Ch'tait comme un ridgieau, assez faibl'ye, sans grand' couleu l'long dé l'horizon. J'restis êbahi dans l'gardîn à r'garder, et au d'ssus d'ma tête d' autres lueurs dansaient dans l'ciel. Chein qu'j'vis chutte niet-là 'taient les Mathionnettes, mais ch'est assez rares d'les vaie en Jèrri, partitchulièthement en êté. Au mais d'Octobre ch't' année, des Jèrriais l's ont veu acouo eune fais, et j'avais espéthé d'les r'vaie mé-même, mais j'n'avais pas d'chance chutte fais.
Dans les régions du nord, en Russe, en Norouague, au Cannada et Alaska, nou vait les Mathionnettes bein pus souvent, et les mais d'Octobre, Févri et Mar sont les siens quand i'sont les pus actives. Les Mathionnettes sont associées auve l'activité solaithe et l'appathence des taques et d's êparts sus l'solé, et i'sont à lus mus touos les vîngt-sept jours. I' sont visibl'yes à peu près eune fais par mais au nord d'Êcosse, mais rein qu'eune fais les deux chents ans sus La Lîngne. Lus nom Latîn est Aurore Boréale, tchi veurt dithe lé rouoge assinne du nord, et i'fûtent ainsi nommées par Galilée pa'ce qu'en Italie, éyou qu'i' d'meuthait, les Mathionnettes sont pustôt rouoges, tandis qu'i'sont d'habitude vèrtes dans les cieux au nord.
S'lon un auteu, “n'y a pon d'plieunme tchi peut dessinner, ni des couleurs pour peindre, ni des mots pour dêcrithe l'êcliat des Mathionnettes, tch'ont ravis la race humaine d'pis des siècl'yes.”
Tony Scott Warren
Viyiz étout: