L'Assembliée d'Jèrriais
Rêunion mensuelle au Mangnyi d'St. Jean
L'Assembliée d'Jèrriais
Pour pouver profiter du jour, la routine dé la rêunion mensuelle fut changie, vendrédi l'27 d'août, quand eune chentaine dé membres lus rêunîtent au Mangnyi d'St. Jean d'la Hougue Boête.
Preunmiéth'ment, l'Président, l'Député A.C. Quérée, en faîthant la beinv'nue ès membres, prînt l'opportunité dé r'mercier Moussieu et Mme. Carnégie, qu'avaient ieu la bonté d'laissi les membres vaie l's alentours du mangnyi. En rêponnant, Moussieu Carnégie, à san tou', fît la beinv'nue ès membres et l's invitit à vaie lé d'dans du mangnyi.
Tous 'taient si charmés d'vaie les appartein'ments, lé bieau pliafond en entrant, et la vielle âtre dans la salle à mangi, et l's autres à m'suthe qué nou-s-allait. Auprès, à marchi à san laîsi, parmi les bieaux bouaix, et l'tou' du vivyi auve les canards.
Sans doute, tous futent vaie la chapelle, au haut des gardîns. Ch'tait si trantchille et paîsiblye ichîn qué tous avaient dêpié qu'la niet v'nait si vite, et qu'i' 'tait temps d's'en aller pour la Salle Parouaissiale dé St. Jean.
Lé rapport dé la rêunion du mais d'juillet fut liu et accepté, et la correspondance fut liue auprès.
Lé discours
Un coup l's affaithes finies, lé Président fît la beinv'nue à Mme. Joan Stevens, qui nos donnit des détails du mangnyi, si bein explitchis en Français.
Pour c'menchi, Mme. Stevens nos dit qué l'fief prennait san nom d'la fanmille Boeste, des temps Normands, et i'y a eune hougue tout près qui prînt san nom d'la même fanmille. L'origine du fief fut bein întérêssant à ouï; d'abord toute terre apparteinait au Souverain, qué ch'fusse lé Duc dé Normandie ou l'Rouai d'Anglyétèrre. Lé Souverain donnait des terres à des gens pour difféthantes raîthons, et ches terres dév'naient des fieux. Lé t'nant du fief d'vait certaines services au Rouai, et en r'chévait des souost'nants. Un fief peut être vendu ou laîssi à d's héritchèrs, mais chaque fais auve permission du Rouai.
La maiethon du mangnyi est la d'meuthe du Seigneur du fief; d'même ch'est impossiblye d'aver un mangni sans un fief, mais dans l'cas du Mangnyi d'la Hougue Boête dé St. Jean, Mme. Rayworth ertîns l'fief quand ou' vendi l'mangnyi.
Ch'tait surprennant d'ouï combein d'noms d'fanmille qu'avaient 'té en possession du mangnyi dépis la fanmille Barentîn dans l'14 ième siéclye, par héthitages et par vente.
Mme. Stevens donnit des détails dé la maiethon; un point à r'mertchi est un fou en driéthe dé l'âtre, dans la tchuisinne d'aut'fais.
Ch'n'est pas trop seux ou-est qu'la vielle chapelle était, mais la sienne bâtie par Mme. Rayworth en mémouaithe dé Moussieu Rayworth est bein belle.
Ermerciéments
Lé Président ermercyit acouo eune fais Moussieu et Mme. Carnégie, qui 'taient v'nus dans la salle avec les membres; Mme. Stevens pour san bouan discours; lé Connêtablye Le Vesconte pour la salle; et les membres du Conmité Social pour les raffraichiss'ments.
Annonces
Duthant la séthée, Moussieu Quérée annoncit la rêunion générale annuelle pour vendrédi, l'24 dé septembre, dans la Salle Parouaissiale dé la Trin'té, et qui s'sa suivie par des portraits prînts par Mme. Le Sueur quand ou' fut en Améthique. Eune aut' date qu'i'' n'faut pas oublier est l'concért par des membres dé L'Assembllaïe d'Guernésiais, jeudi, l'17 d'octobre, à St. Aubîn.
Viyiz étout: