Les Pages Jèrriaises

Quand hougues et hoummets haûtent

Quand hougues et hoummets haûtent au haut d'l'Êté,
les mielles rêvent sus lus ouothilièrs d'melgreu;
les batchieaux laguent lus bliancs rions en mé;
les avions graient des longues blianches rîl'yes ès cieux.

Souos les mèrs à haut, les côtis job'linnent;
les creux et baies craûlent - les falaises en bèr;
les rocques froutchies en crête dé co et glinne;
les aidgillons mettent la tchéthue en Sèr.

Avaû la grève, eune lisiéthe est mouoillie;
lé sablion fretté par lé bliu d'la mé.
Man co est mèrtchi en frontchiéthes hâvies;
lé solé lit sus des cliôsées d'rouoge pé.

Geraint Jennings
2011
 

Viyiz étout:

 

Les Pages Jèrriaises