La Hougue Bie
La Hougue Bie, en la Pâraisse dé Grouville en Jèrri, a 'té un centre d'activité humaine dépis pus d'siêx mille ans. La hougue fut bâtie pouor couvri eune pouquelaye Néolithique y'a dans les siêx mille ans. Auprès l'arrivée d'la Chrêtchienn'té eune chapelle fut bâtie sus l'copé d'la hougue.
La hougue a dans les 12m dé haut et 58m dé dgiamètre.
La pouquelaye
La pouquelaye (ou allée couvèrte) fut bâtie y'a dans les siêx mille ans, sans doute preunmiéthement coumme eune sépultuthe pouor y'entèrrer des morts. Ofûche des chefs ou des gens împortantes? L'allée a neu mètres dé long et nou-s'a à s'baîssi pouor marchi jusqu'à la chambre. Ch'tait un endrait partitchulyi et i' pathaît qu'ch'tait împortant d'empêchi un accès trop libre au d'dans du monument. La dêfouithie d'1924/25 trouvit des buts d'os d'au mains huit pèrsonnes (dé tchi deux-trais 'taient des femmes et quat' ou chînq 'taient d's hoummes. N'y'avait pon hardi d'os pouor un si grande structuthe, et la parfèn'nie d'os suggéthe qué l'endrait d'entèrrement avait 'té dêconsacré quand la tombe fut freunmée.
Eune ênorme mouaie à d'grés fut bâtie sus la pouquelaye.
Y'a dans les quat' mille chîn chents ans, pouor tchique raîson, la tombe changit d'fonction. L'entrée fut bliotchie par eune muthâle en pièrre secque. Si ch'tait un changement d'pratique èrligieûthe ou sociale tch'avait pèrsuadé les gens d'bliotchi d'même lé tombé, nou n'sait pon. Si ch'tait l'abandon du site ou eune freunm'thie rituelle est eune tchestchion tch'est hardi distchutée parmi l's expèrts.
Auprès chenna, toute la structuthe fut couvèrte dé tèrre, et l'hèrbe couvrit la hougue. I' sembl'ye qué pouor des milles ans la hougue fut laîssie.
Ès année 1920s ch'tait la tombe tchi 'tait l'centre d'întéthet archéologique, mais pouor la fîn du vîngtchième siècl'ye les expèrts avaient r'considéthé l'rôle dé structuthes Néolithiques dans l'paysage, et nou c'menchit à s'întérêssi dans la structuthe d'la hougue entre la pouquelaye en d'ssous et la chapelle sus l'haut.
La chapelle
La chapelle qué nou vait achteu est eune èrconstruction d'un bâtisse Nouormand, sans doute, mais i' n'y'a pon d'mention d'vant la fîn du tchînzième siècl'ye. Dans les preunmié années du seizième siècl'ye la chapelle est mentionnée coumme "la Chapelle de Notre Dame de la Clarté". Lé Douoyen d'Jèrri, R'chard Mabon, tch'avait fait un pèl'rinnage à Jéthusalem dans les 1520, décidit d'èrgraie la chapelle coumme un endrait d'pèl'rinnage. En d'ssous d'la chapelle i' creusit eune "tombe dé Jésû-Chri" et l'aître dé l'Êst dé la chapelle d'vînt eune chapelle dé Jéthusalem. S'lon des r'cits, l'Sieur Mabon tricachonnait des "mithacl'yes" dans la chapelle à seule fîn d'gângni des sou des pèl'rîns tch'y'affliotchaient ès jours dé fête èrligieûthe. J'dîthons tréjous en Jèrriais: "Ah, ch'est mithacl'ye à La Hougue!" pouor tchiquechose qué nou n'peut pon craithe. Tout coumme, y'en a tchi dîthent qué ch'est d'la propagande Protestante contre les Catholiques.
Iun des r'êffets pôssibl'yes d'la "tombe" et la f'nêt' tch'est tchuthieûthement pliaichie. Au R'nouvé et au Stembre lé solé pouvait entrer dans la tombe, pus à co d'la même manniéthe dé l'êcliaith'thie des solstices pouor tchi qu'la pouquelaye (à chu temps-là acouo muchie souos la hougue et înconnue - ou ch'tait-i'?) avait 'té grée dans les touos vièrs temps. D'aut' êvidence pôssibl'ye du cont'nu d'la "tombe" est lé "p'tchiot pétrifié" tchi 'tait exhibé dans la Tou du Prînce jusqu'au tout c'menchement du vîngtchième siècl'ye. À chein tchi pathaît, chutte stchulptuthe (tchi n'tait pon contre la légende racontée un mousse tch'avait 'té touônné en pièrre, mais eune sépultuthe ofûche du seizième siècl'ye) avait 'té dêmuchie duthant des travaux épis exhibée auve tout l'restant des vieillâqu'thies ajouôtées à la décothâthion d'la d'meuthe néo-Gothique.
À la R'formâtion au seizième siècl'ye, les chapelles fûtent abandonnées et La Hougue Bie d'vînt d'la propriêté privée.
Bétôt auprès la mort dé R'chard Mabon en 1543, la Couronne èrvendit la chapelle à des propriêtaithes tch'éthaient peu la faithe sèrvi coumme démeuthe. Au dgiêx-huitchième siècl'ye nou proposait d'dêmoli la chapelle mais la Cour Rouoyale né l'allouait pon. Nou dit qu'en 1728 lé cliochi fut passecrit par un êpart dé feu.
La tou
En 1759 James d'Auvèrgne acatit La Hougue Bie et quémenchit la bâtithie d'eune tou néo-Gothique sus la chapelle au copé d'la hougue et en 1792 baillit la propriêté à san n'veu, Ph'lippe, tchi d'meuthait à la siette dans la tou. Ph'lippe d'Auvèrgne d'vînt un Prînce, dé Bouoillon, eune p'tite prîncipaûté en Ûrope, et la tou vînt connue coumme la Tou du Prînce. Lé Prînce faîsait sèrvi sa tou coumme des sîngnaux et un centre d'espionnage duthant les dgèrres Napoléoniennes. Mais auprès la paix, i' n'put pon r'gângni sa prîncipaûté tchi fut încorpouothée dans un pus grand êtat, et i' fut souos l'fou et mouothit en 1816.
L'hôtel
La Hougue Bie fut acaté en 1817 par lé Lieut'nant-Gouvèrneux d'Jèrri, Hugh Mackay Gordon, tch'éthait peu bein faithe sèrvie la tou coumme eune résidence. Mais auprès 1821 ch'tait d'l'èrcriâtion et du laîsi tch'y régnait au run coumme nou dêv'loppait des gardîns d'pliaîsi
Dans les 1830, eune hôtel fut bâtie auve des gardîns, eune boul'lie et d's attractions. Auve lé dêv'loppement du tourisme la Tou du Prînce dévînt eune pliaiche qué les vîsiteurs aimaient vaie, sustout à seule fîn d'monter au haut d'la tou pouor aver eune belle veue panoranmique dé l'île.
Mais pouor la fîn du dgiêx-neuvième siècl'ye, la tou touônnait en d'lacres, endgèrruée et néglyigie.
En 1912, y'eut eune proposition qu'les Êtats d'Jèrri acatîssent La Hougue Bie mais l'êffort mantchit.
La dêfouithie 1924/25
En 1919, lé site fut acaté par La Société Jersiaise pouor £750, et quand la bâle fut ag'vée en 1925, la Société dêmolit la tou. La tou avait acouo eune forte structuthe mais l'architectuthe néo-Gothique 'tait horte dé faichon et la Sociêté aimait mus s'dêbâter d'la tou qué d'la restaurer, v'là tchi tèrgéthait les dêfouithies souos la hougue. Les archéologistes dé la Société Jersiaise voulaient dêfoui la hougue, et duthant les dêfouithies i' dêmuchîtent la pouquelaye tch'avait 'té entèrrée souos la hougue y'a des mille ans. En ouvrant eune tonnelle souos la hougue, les archéologistes n'avaient pon trouvé exactément l'alîngn'ment tch'allouêthait au solé d'entrer dans la tombe ès êtchinnoxes. I' griyîtent eune tonnelle en chînment (et brique dé la Tou du Prînce dêmolie) et v'là tchi restait l'entrée quâsiment jusqu'à la fîn du siècl'ye.
Lé site fut ouèrt au publyi coumme un mûsée archéologique pouor la preunmié fais. Au mais d'Avri 1925 nou chèrgeait les vîsiteurs douze sou pouor entrer dans la tombe.
Chein tchi restait d'la chapelle tch'avait sèrvi d'bas d'la tou, 'tait pouor êt' restauré, mais l'èrgraiethie d'la chapelle a pus d'înmaginnâtion qué d'rêalité. Nou peut admithé la peindrie d'muthâles du Mouoyen Âge tchi fut dêmuchie en 1924 souos eune couoche dé lait d'caux et du pité. Jusqu'en 1973 quand la peindrie fut nettie, nou criyait qu'ch'est eune scène dé l'Annonch'chie, mais i' s'adonnit qu'ch'est eune pathe d'archanges. Ch'est pôssibl'ye qu'i' 'taient peints là pouor adouother eune statuette d'l'Assomption d'la Vièrge Mathie. N'y'a pon hardi d'peindrie d'muthâles tchi restent en Jèrri du Mouoyen Âge: les aut' exempl'yes sont dans la Chapelle ès Pêtcheurs à Saint Brélade, et l'Églyise Pârouaîssiale dé Saint Cliément. La chapelle fut r'dêdiée par l'Êvêque dé Ouînchêtre en 1931.
L'hôtel néo-Gothique fut dêmolie étout, acouo eune pèrte d'architectuthe qué nou peut r'gretter. N'y'a quâsiment rein tchi reste au jour d'aniet d'l'hôtel et ses offices. Lé café (la vielle salle dé thée) et la louoge (tchi 'tait la cheinne du gardgien) fûtent bâtis 1925-1926, en r'faîthant sèrvi des buts d'architectuthe d'la tou et d'l'hôtel.
L'Otchupâtion
Duthant l'Otchupâtion 1940-1945, un bunkèr Allemand fut bâti sus les tèrrains du site, un abri dans un bord d'la hougue même, et eune tou d'dget au ras d'la chapelle.
Lé 10 d'Mar 1942 lé gardgien du site rapportit qu'les Allemands avaient c'menchi d'apporter d's ôtis et des matéthiaux pouor la bâtithie d'fortificâtions. Des gens d'la Société Jersiaise lus en fûtent pâler au pèrsonnel du c'mandant Allemand pouor explyitchi l'împortance historique du site. L's Allemands laîssîtent la chapelle (sénon pouor la tou d'dget en bouais sus l'haut d'la hougue) et la tombe, mais bâtîtent lus bunkèr, creusîtent des tranchies, pliaichîtent des fûsi-machinnes et du fi d'fé barbé l'tou du site. Lé gardgien d'la Société Jersiaise fut laîssi dans sa maîson, et les soudards Allemands otchupîtent la grande maîson Broadlands entrait l'site.
Les mûsées
En 1948 lé bunkèr fut ouèrt au publyi coumme un mûsée d'l'Otchupâtion, et en 1955 La Tchèrquéthie, un mûsée d'l'agritchultuthe, fut êtablyie à La Hougue Bie, sus l'site d'la vielle boul'lie d'l'hôtel convèrtie en garage. Épis des nouvelles gal'lies fûtent ouèrtes en 1977 (sus l'site dé la vielle hôtel) pouor explyitchi l'archéologie et la géologie d'l'Île.
Quand L'Héthitage d'Jèrri fut êtablyi dans l's années 1980s i' prînt la responsabilité d'adminnistrer les mûsées d'La Société Jersiaise.
La restaurâtion et l'dêv'loppement d'à ches drein
En 1991-1995 l'entrée à la pouquelaye fut r'grée et restaurée et pouor la preunmié fais dans des mille ans, l'solé d'la solstice du R'nouvé sé sîlyit jusqu'au fond d'la chambre, lé 20 d'Mar 1996.
En 2000 la mouontréthie militaithe dé l'Otchupâtion dans l'bunkèr fut rempliaichie par la ramémouaith'thie d's ouvrièrs forchis tch'avaient 'té transportés en Jèrri par l's Allemands dé partoute l'Ûrope à seule fîn d'travailli sus l's înstallâtions militaithes.
Dreinement, l'èrconstruction d'eune longue maîson Néolithique à 'té bâtie dans l'tèrrain d'la hougue à seule fîn d'explyitchi ès gens coumme tchi qu'lé monde Néolithique vivaient. Entre 2017-2019 eune êtchipe dé volantaithes travaillaient atout d's ôtis et des matéthiaux comme les gens Néolithiques éthaient fait sèrvi y'a des mille ans. Dgidés par d's expèrts, ches volantaithes griyîtent un centre tchi sèrt èrsource ès vîsiteurs, des êcolièrs et des grandes pèrsonnes, entouor la vie d'ches preunmié fèrmièrs tch'avaient bâti la hougue. La longue maîson a vîngt mètres dé long.
D'aut' bord dans un clios dans la Pâraisse dé Grouville, eune anichette dé pièches dé sou fut dêmuchie par des détecteurs dé méta en 2012. I' rapportîtent lus dêcouvèrte ès autorités et l'travas d'èrchèrche et d'nettithie fut entanmé par l'Héthitage dé Jèrri. Ch'tait la pus grande anichette dé pièches janmais trouvée dans toute l'Ûrope: dans les septante mille pièches Celtiques, des teurques en or, des paqu'nôtes en vèrre, et d'aut' choses. L'anichette fut acatée par lé Gouvèrnément d'Jèrri et est achteu exhibée dans eune mouontréthie à La Hougue Bie.
Viyiz étout: