Les Pages Jèrriaises

La bat'tie ès Pezeries

La baronmette ès pouôrres gens sus les d'grés;
du chînment êcrouôlant parmi lé geon;
d'la pèrche-pièrre taqu'tée, vèrt cliai, en touffets
sus l'grannit d'la bat'tie, auve les canons.

Les nièrs canons mithent la mé, bliue avant;
campries et cantées les muthâles gabathent;
des bathilyies dé blius êparts mithent blianc;
et des rouoges vailes scodent, scouotres à la vaûbathe.

Les roses muthâles, chotchies par la pèrche-pièrre,
sont pliodgies dans les bliancs ouïyeurs du r'sîn;
eune êtînchelle êlectrique tch'est lé vèrt
tchi taqu'te en attaque la pièrre couleu d'vîn.

J'en bai, ma fé, tout l'pliein ès louêmes et lueurs;
j'sis trans'mé atout chu vièr vèrt battement.
Èrpliogue-mé dans chutte bat'tie ès couleurs;
m'suthe-mé auve la baronmette ès pouôrres gens.

Geraint Jennings
2011
 

Viyiz étout:

 

Les Pages Jèrriaises