Nos v'chin au seizième mais d'l'année et nos v'là qué j'appréchons du pus long jour. Dans rein d'temps les jours c'mench'chont à raccourchi et les bouôns pliaingnants dithont qué j'n'avons pas ieu d'été. Acouo bein tch'i' fit bieau temps au mais d'mai et qué j'avons ieu dé longues journées dé chaleu à ches drein, auve un solé tchi nos a ravigoté les esprits.
J'en avons profité, ma femme et mé, du bieau temps. Auve les restrictions à cause d'la fièvre aphteuse, nou n'peut pon laîssi les tchians à banon dans les clios ni sus les routes. Mais, heutheusement, i' peuvent aller libres sus d'partitchuliéthes sections d'la grève. Nou peu sé sèrvi dé la pliûpart d'la Baie d'Saint Ouën d'vant dgiez heùthes et d'mie du matîn et après siex heuthes lé sé. J'allons d'habitude dé bouonne heuthe lé matîn, stâtionnant not' vouaituthe ès Laveurs sus la Route des Mielles. J'arrivons d'vièrs sept heuthes et, j'vos garantis, chest rare qué j'sommes les preunmièrs. Maîtres et maitrêsses sont dêjà là auve lus tchians - ch'est eune vraie mênag'gies! I' y'en a dé toutes les sortes - p'tits et grands, courts et longs, maigres et gros, dé puthe race et dé race mêlée. Là-bas j'nos rencontrons comme eune grand' fanmil'ye - tous sont anmîns et j'nos promenons ensembl'ye. Même les tchians s'entre-r'connaîssent et s'entré-suivent. I' y'en a tchi s'lanchent dans la mé tandis qu' d'autres restent tout près d'lus maîtres.
J'viyons souvent plusieurs j'vaûcheurs à exèrcer lus j'vaux ou à pratitchi pouor les courses à Grosnez. Not' tchianne est tréjous contente dé les vaie car ou crait qué ch'est sa responsabilité dé les chasser - ou crait qué la grève appartcheint ès tchians et qué les j'vaux n'ont pas lé drouait d'aller sans pèrmission sus san territouaithe. Ou n'a pon grand temps ni n'tout pouor les pus ênèrgiques d'la race humaine - chest san pliaîsi dé ouasser à tigue dé corps quand les couotheurs nos dépassent et si j'nos mêfions pas ou s'met à couôrre souotre ieux pouor lus gaffer la g'vil'ye du pid !
Véthe, j'en avons d'l'excitement la preunmié chose lé matîn mais ch'est eune supèrbe heuthe pour sé prom'ner lé long d'la grève quand i' fait bieau solé. L'odeu d'la mé et du vrai vos rafraîchit les nâsilles et vos rempl'ye les ponmons. Lé son des louêmes est eune musique pouor les ouothelles et la veue des pêtcheurs dans lus p'tits batchieaux est un vrai portrait, sustout quand l'ieau èrlit dans les rayons du solé. I' sembl'ye qué, à chutte heuthe, tout est paisibl'ye dans l'monde même qu'i y'ait tant d'activité lé tou d'sé.
Châque matin qué j'faîthons not' touônnée j'èrmèrcions lé Bouôn Dgieu pouor nos aver pliaichis dans un si bel endrait dé sa créâtion. Not' p'tit Jèrri nos offre tant d'bieauté et ch'est triste qué jé n'sommes port assez èrconnaîssants pouor tout tch'est là pouor not' pliaîsi. Ma belle-méthe soulait m'en ramémouaither. Ou disait si souvent "Oh, arrête ichîn - èrgarde la belle veue - véthe, qué j'arrêtons pouor en joui".
Liêthant la gâzette du sé, j'ai l'împression qué j'sommes entouorés d'un tas dé malcontents. I' y'en a tchi sont tréjous à lus pliaindre. Véthe, ch'est vrai qué j'avons veu eune mâsse dé changements dépis la fin d'la grand' dgèrre. Ch'n'est pus lé Jèrri du temps pâssé, et dans l'nom du progrès i' y'a bein d'tchi qui s'est arrivé que j'éthêmes bein voulu éviter. Mais la bieauté natuthelle dé Jèrri est acouo là et j'dév'thêmes prendre lé temps d'admither les mèrveil'yes qué Dgieu a créées. J'avons eune înmense variêté sus not' pas d'porte - la côte rotcheuse du nord, les sablions dorés du sud, la mé tout à l'entou calme et trantchil'ye aniet mais p't-être dêmontée et annînmée démain, clios et côtis labouothés auve tant d'soin, pâtuthes auve la fanmeuse vaque jèrriaise. J'vivons en paix et j'nos couochons et j'pâssons la niet en seûtheté. Lé Bouôn Dgieu nos bénit châque jour et j'avons tous l'opporteunité d'être èrmèrciants pouor sa bouonté envèrs nous.
Brian Vibert
Viyiz étout: