Fallbrook,
California, USA.
Moussieu l'Rédacteu,
"Tu m'as dit bein des fais tch'i' faut tréjours dithe la véthité", j'disais à Papa eune séthée quand j'tions à l'entou d'l'âtre y'a quâsi nénante ans. "Et les maîtres et maitrêsses à l'êcole nouos disent la même chose, et Mess du Heaume nouos l'dit étout à l'Êcole du Dînmanche. Ch'est en tchi j'ai trouvé ch'la drôle dans la forge à matin quand j'ai ouï Maît' Cliément L'Cornu dithe qué la vethité n'est pon tréjours bouanne à dithe".
"Eh bein , man garçon", Papa m'dit, "j'sis bein content d'vaie qu'tu'as bouanne ouïe pour tout qu' tu ouait les grand' pèrsonnes dithe dans la forge. Nouot' vielle langue Jèriaise est si riche qué tu'es seux d'ouï d's expressions tchi s'entre-contrédîsent. L'expression la véthité n'est pon tréjours bouanne à dithe en est ieune. Ch'est un vièr diton tchi s'applyique dans cèrtains cas où'est qu'ch'est sage, pour sauver d'l'embarras à tchitchun, dé n'pon répéter tchiquechose viyant qué v'là tchi pouôrrait aver un êffet malheutheux pour autrui. Dans tel cas, ouaithe qué nou pouôrrait r'connaître tchique véthité, ch'né s'sait p't-êt' pon bouan dé l'dithe et i' vaudrait mus s'taithe. Mais i' n'y'a rein tchi justifie pèrsonne dé menti".
"Tch'est qu' ch'est qu'un téléphone?", jé d'mandis à Papa. "Mess Hubert Dgeinn'tile té disait dans la forge tch'il est à penser d'en aver iun pour qué les gens piêssent l'appeler pus vite quand lus j'vaux ou lus vaques sont malades"
"Ch'est eune manniéthe dé bouaîte ou machinne qué nou pâle dédans", i' m'dit. "La vouaix est portée sus des fis d'fé à eune bouaîte ou machinne sembliabl'ye siez eune aut' pèrsonne, et i' peuvent s'entre-pâler aussîn aisiêment comme s'il' 'taient dans l'même appartenement".
"J'pense bein qu'la vouaix n'peut pon aller bein liain sus du fi d'fé. Ithai-t-alle d'ichîn siez Maît' Abraham Lé Ruez?", j'lî d'mandis.
"Mais ou peut êt' portée autcheune distance, même d'ichîn à Gouôrray", Papa m'dit, "pour bein tch'i' y'aie di fi d'fé d'eune bouaîte à l'autre. J'pâle d'eune bouaîte ou machinne viyant qué jé n'sai pon l'vraie nom. J'crai qu'en Français nou dithait qu' ch'est un 'appareil téléphonique'".
"Mais ch'est quâsi încriyabl'ye", j'dis à Papa, "qué la vouaix pûsse sé porter sus du fi d'fé tchi n'a pon d'vie".
"Eh bein, tu pouôrras en ouï la preuve té-même la préchaine fais qu' j'îthons vaie tes Parrain et Marraine d'Aubert à La Mouaie à St Brélade", i' m'dit, "I' veinnent d'en aver iun d'înstallé siez ieux, et tu pouôrras pâler d'là à Mess Hubert ichîn à St Ouën s'il a l'sien par chu temps-là.
"J'sommes sus l'point d'vaie bein des choses qué nouos anchètres éthaient creu êt' des mithacl'yes" Papa continnuit. "Un tas d'choses sont faites à la machine à ch't heu. Et même dans la forge j'sommes à faithe lus tchéthues en fé à la pliaiche d'en bouais. I' pathait qué l'temps s'en va v'nîn qué nou pouôrra viagi dans l'air aussîn bein comme sus tèrre et sus l'ieau. Sans doute, j'né s'sai pon là pour vaie toutes ches mèrvelles, mais tu les vèrras si l'Bouan Dgieu t'prêsèrve et tu pouôrras penser en mé et t'èrsouv'nîn qué j't'l'avais dit".
"Mais es-tu un prophète, Papa?", j'lî d'mandis. "A l'Êcole du Dînmanche quand Moussieu Pépîn ou Moussieu Bichery nouos aîguent à liéthe la Bibl'ye, nou liet entouôrre des anciens appelés des prophètes, tchi disaient l'av'nîn".
"Oh mais nannîn, j'n'en sis pon iun", i' m'dit, "Mais i' n'est pon bésoin d'êt' un prophète pour vaie qu'des changements nouos attendent. I' y'en a dêjà ieu plusieurs. Des navithes en fé rempliaichent les navithes en bouais et d's engîns les font marchi à la pliaiche dé vent. J'avons des cârrosses tchi vont sans j'vaux, et nou peut pâler, atout l'aigue dé chu téléphone, à d'aut's pèrsonnes des milles pus liain.
"Et Moussieu Pepin m'disait l'aut' Dînmanche qué même la Bibl'ye nouos dit qué l'av'nîn s'en va nouos apporter des changements, mais tch'i' né s'son pon tous pour lé mus. Enfîn, comme nouos l'dit un aut' vièr diton: Tchi vivra vèrra'"!
George d'La Forge
Viyiz étout: