Trenton,
Michigan, USA.
Lé 13 d'octobre, 1979.
Moussieu l'Rédacteu,
Lé fanmeux dictionnaithe Larousse donne eune magnifique întérprétâtion du mot “nostalgie”. I' nouos dit qu' ch'est “Une mélancolie causée par un vif désir de revoir sa patrie.” Eh bein, j'peux dithe qué j'eus chu grand d'si d'èrvaie Jèrri pour bein d's années auprès m'n arrivée dans l'Nouvieau Monde en 1919. Jé n'peux quand-même affirmer qué chu grand d'si 'tait au ras d'eune mélancolie, un êtat d'esprit tch'est explyitchi dans Larousse comme étant “Un état morbide de tristesse, tristesse de dépression, tristesse vague,” car j'tais trop embarrassé à gângni ma vie et mett' dé côté pour ma vieillesse qué jé n'mé pèrmettais pon d'êt' en êtat mélancolique. Mais y'a telle chose, mentionnée étout dans Larousse, comme eune “douce” mélancolie, et j'pouôrrais p't-êt avouer qué mes pensées s'envolaient souvent envèrs Jèrri, sustout quand j'viyais la mé, sus l's ailes d'eune douoche mélancolie, et qué l'ambition tchi dominnait m'n esprit, 'taient alliés au d'si d'èrvaie Jèrri et d'y r'démeuther un jour.
A ch't heu, tant pus qué j'vieillis, tant pus j'pense à m's anchêtres, ches bouans vièrs à tchi j'dai m'n existance, et ch'est p't-êt' ches pensées tchi m'donnent la satisfaction d'èrdémeuther, duthant la maîntchi d'mes vièrs jours, dans L'Ménage ès Feuvres, ès Landes à St. Ouën, à tchi j'ai drouait - comme mé l'dit lé R'gistre des Contrats - comme “Seul héritier de Charles Le Feuvre (1834-1911), qui avait droit de Jean Thomas Le Feuvre (1804-1873), son père, qui avait droit de Mr. Elie Le Feuvre (1756-1828), son grand-père, au droit de Mr. Philippe Le Feuvre (1723-1807), fils Philippe (1663-1745), son père.” V'la tchi prouvé qué L'Ménage a 'té dans ma fanmil'ye pour trais chents ans, dépis qué l'drein Philippe mentionné fut né en 1663. Charles Le Feuvre 'tait man grand-oncl'ye, et l'fréthe dé George (1836-1903), man Papa.
Comme mé, il' ont viagi, ches vièrs anchêtres, réchinnes dé St. Ouën, et ch'est probabliément d'ieux qu' j'ai héthité man “pied marin” et l'envie d'viagi tchi m'a donné l'mênom dé “Pigeon Voyageur”. Ch'tait à êcouter Papa et les Landîns d'alentou d'la forge bailli d'lus becques entouôrre La Côte, Tèrre-Neuve et Caratchette au sé dans la forge, et l's histouaithes dé la vie et d's aventuthes dé Papa à bord des navithes, qué l'goût d'la mé et lé d'si d'viagi fûdrent nés dans m'n esprit.
I' n'tait pon tout seu d'sa sorte comme naviguant, man Papa. Trais d'ses fréthes, Jean (né 1828), Charles (né 1834), et Françouais (né 1845), 'taient touos à La Côte en même temps. Jean y fut n'yé en r'vénant d'la pêque dé la mouothue quand deux cotteurs fûdrent coulés dans eune tèrribl'ye tempête. Charles èrvînt en Jèrri pour souangni d'sa m'mèe et du Ménage quand san p'pèe (Jean Thomas) mouothit. Sa m'mèe 'tait ma grand-grand-méthe, née Lîsabé L'Brun (1806-1895).
Françouais fut tué hors pays, mais j'n'ai janmais seu ioù. George, man Papa, restit à tèrre quand i' s'mathyit. Il avait 'té apprendre sa vocâtion comme forgeux siez s'n oncl'ye matèrnel Le Brun à St. Jean à l'âge d'onze ans, et r'vénait à pid ès Landes pour pâsser l'Dînmanche siez ses pathents eune fais par mais. I' s'en fut en mé et navidgit en compangnie dé Charles Le Cornu, d'La Villaise, tch'avait mathié Lîsabé L'Feuvre dé la fanmil'ye dé Gros Nez.
Papa mathyit Ann Le Feuvre (1841-1925), fille dé Pierre Le Feuvre dé La Ville La Bas. Oulle 'tait sa couôsinne gèrmaine eune fais r'muée. Pierre La Feuvre (1799-1875) allait à La Côte touos l's êtés pour aidgi à rabilyi la mouothue, èrvénant en Jèrri l'hiver pour travailli sa tèrre. Pierre (1832-1843), lé grand d'ses garçons, fut n'yé en s'bangnant dans La Baie d'St. Ouën à l'âge d'onze ans. Un aut' fîs. Elie Philippe (1839-1879), d'vînt Cap'taine dé navithe. I' mouothit en ville dé la conseunmtion. Un aut' fîs, nommé Peter, né 1844, 'tait naviguant étout. I' fut n'yé à Chèrbourg en gângnant san navithe dans eune grosse mé auprès aver porté san Cap'taine à tèrre. San corps fut r'trouvé et entèrré à Chèrbourg.
Un aut' fîs, Françouais (1846-1899), 'tait en mé étout. I' v'nait d'pâsser pour Cap'taine quand un palan lî tchit sus la tête à bord dé san navithe, et i' fut forchi d'tchitter à navidgi. Pus tard, i' pèrdit ses idées et fut mîns à l'Asile où'est tch'i' mouothit. Sa veuve, née Elizabeth Ann Le Cras, mathyit William George Bridle tch'avait eune boutique à p'tun dans Mulcaster Street en ville.
Acouo un aut' fîs, Ph'lippe (1849-1913), tchi mathyit Emélie Le Ruez, fut en mé toute sa vie. Il 'tait contrêmaitre dans les navithes au long cours, et ouaithe tch'i' n'tait pon Cap'taine i' r'am'nit san navithe en Jèrri dé Buenos Ayres quand san Cap'taine mouothit en mé.
Est-ch' ravissant qué j'ai l'goût d'la mé et d'l'aventuthe dans la couënne? J'l'ai héthité des deux bords, car man grand-péthe matèrnel, Jean Philippe Giffard, 'tait Cap'taine étout!
George d'La Forge
Viyiz étout: