Trenton,
Michigan, U.S.A.
Lé 17 d'avri, 1982.
Moussieu l'Rédacteu,
Nouos v'chin dêjà à mié-avri et l'temps est acouo fraid. J'mé d'mande tchi temps tch'i' fait en Jèrri. J'mé r'souveins d'man janne temps à St Ouën et St Brélade quand nou c'menchait à s'bangner et nouer dans la mé l'preunmié d'avri, et qu' nou continnuait à s'bangner jusqu'à la fîn d'septembre. L's êtés 'taient cauds dans chu temps-là et nou pouvait s'fier d'ssus, et acouo y'en a tchi vouos dithont qué les temps n'ont pon changi. I' m'sembl'ye quand-même tch'il ont changi un mio partout l'monde. J'ai connu la tempéthatuthe à quarante dégrés (Fahrenheit) en d'ssous d'zéro à Ottawa au Cannada les trais ans qu' j'y d'meuthis (1919-1922), et j'ai l'împression qué la fraid a molli à Ottawa et qu' oulle a r'fraidgi acouo pus dans ches parages ichîn, chin chents milles à l'ouest.
Quand j'tais mousse en Jèrri jé n'mé r'souveins pon d'aver veu autcheune aut' chose dans les clios qué des patates et les réchinnes pour lé bestchias. Mais ches dreines années, lé mio d'hivé qu' j'ai veu là-bas m'a ravi d'vaie les fèrmièrs dans les clios à l'înjuthe du temps. Eune récolte tchi m'a pathue duthe à r'colter est l'brécoli, prîncipalement pour les femmes. Quand i' tchait d'la plyie et tch'i' faut êt' parmi les rangies d'brécolis, p't-êt' mouoillis à la pé, pour les coper, ch'n'est pon du fanne dans la canne !
Dans man janne temps nou n'viyait pon fort dé sèrres dans la campangne à mains qué ch'fûsse eune pétite pour les flieurs en pot contre lé d'vant d'la maîson dans l'gardîn des maîsons des Mêssieux. Les grand' sèrres pour lé commèrce des flieurs et des tonmates existaient en Dgèrnésy, mais i' n'avaient pon 'couo fait lus appathence en Jèrri j'pâle, sans doute, du c'menchement du siècl'ye. Et l'gardîn à pommièrs dispathaîssait dêjà pour faithe du run pour craître des patates.
Lé fèrmyi a tréjous ieu eune duthe vie. Dans l'temps dé tchi j'vouos pâle, i' pâssait ses nyits au vrai. I' n'y'avait pon la machinn'nie qu' j'avons à ch't heu pour labouother ses tèrres, et ch'tait auve l'aîgue du j'va et d'la main d'oeuvre tch'i' les labouothait. Quand v'nait la dêfouithie, les patates dêfouies à la frouque et êtèrrées à la main 'taient mînsent dans des bathis d'quat' cabots tch'étaient chèrgis dans la vainne auve les "toppers", jaunes comme dé l'or, sus l'haut des bathis. Ch'tait bé à vaie.
J'pense souvent à la duthe vie du pouôrre chéva dans chu temps-là. Ramonter les chèrges d'vrai amont les tchiéthes et L'Mont du Vallet, haler la tchéthue dans les clios, les hèrnais plieins d'réchinnes, et porter les vainnées d'patates en ville. J'ai souvent pensé qu'un j'va est comme eune pèrsonne et sujet ès mêmes maux. Mais s'il a ieu eune mauvaise niet ou tch'i' n'a pon dormi bein et tch'il a ma à la tête quand veint l'matîn, i' faut tch'i' s'laîsse êt' lié ou att'lé. I' n'peut pon dithe à san maître, tch'i' n'sé trouve pon bein. Il a à faithe san jour dé travas et êt' fouetté d'temps en temps si l'maître est sans natuthé! Chose èrmèrquabl'ye est qué si l'maître aimait sa fais à béthe et tch'il entrait à l'aubèrge en r'vénant d'la ville, lé j'va v'nait à connaître l's aubèrges et arrêtait là machinnalement. J'pense bein tch'il 'tait content s'èrposer un mio en attendant pour san maître, un mio d'soulagement d'vant aver à ramonter l'Vièr ou l'Neu Bieau Mont. Ouaithe qué la vainne n'était qu'chèrgie d'bathis vièdes, lé mont d'vait acouo êt' pénibl'ye vèrs la fîn du jour.
Mais i' faut dithe qué j'ai l'tchoeu tendre quand veint l'affaithe du j'va. Ch'est p't-êt' viyant qu'j'ai veu ses souffrances sus l'camp d'batâle dans la preunmié grand' dgèrre (1914-1918). J'tais dans l'Artill'lie d'Campangne dé l'armée rédguliéthe et à j'va mé-même. Quand l'soudard 'tait bliessé, il avait acouo la chance d'êt' souangni et aver la vie sauvée, mais i' fallait abattre lé pouôrre chéva tch'était bliessé. Et tout l'hivé, les j'vaux 'taient amathés, fache à fache, dé châque bord d'un filin amathé entre la reue d'un "caisson" d'canon à un autre, et i' sont là à pativouothinner dans l'pité et à l'înjuthe du temps à londgieu d'jour. Et quand veint la niet i' faut la pâsser à porter l's "obus" ès canons. Heutheusement, i' sont bein souangnis et continuellement êcrédés et brîngis par lus c'valièrs eune fais qu'la plyie s'arrête, et, en général, châque artilleux aime bein san j'va et en prend bouân soin.
George d'La Forge
JEP 22/5/1982
Viyiz étout: