Les Pages Jèrriaises

Les Franc-Machons




San Antonio, Texas,
U.S.A.
Le 12 dézembre, 1970.

Moussieu l'Rédacteu.

Nou ouïyait un tas d'drôles d'histouaithes et d'niolîn entouorre les Franc-Machons quand j'tais mousse, entr'autres tch'il' 'taient êtampés d'tchiquebord pour tch'i' pûssent s'entr'èrconnaître. Pèrsonne né pathaîssait saver où'est qu'l'êtampe 'tait mînse, mais ch'tait généralement entendu qué ch'tait où'est qu'nou s'assied!

Y'en avait, étout, tchi criyaient tch'i' fallait êt' boutés par un bichot, et tch'i' s'pâssait toutes sorte d'drôles cérémonies dans les templ'yes. Eune aut' crianche 'tait qu'un Franc-machon n'pouvait pon êt' pendu et tch'i' n'y avait janmais un pauvre parmi ieux, et qué ch'tait la mort pour lé Franc-machon tch'éthait 'té coupabl'ye du péché împardonabl'ye d'aver èrpété lus ségrets.

Eh bein, j'admets qué jé n'sis pon à mème dé vouos donner les ségrets, mais j'peux vouos dithe qué y'a un p'tit pus qu'chînquante-tch'un an qué j'sis Franc-machon, et j'ai atchumulé trente-deux dégrés d'Franc-machonn'nie dans l'Rite Êcossais, et les dgiex dégrés et quatre ordres d'"Chevalerie" du Templ'ye dans l'Rite dé York, et qu'j'ai l'honneu d'êt' en bouan rapport auve les Grand' Loges d'Angliétèrre, du Cannada et d'l'Améthique, et j'vouos asseuthe qué j'n'ai pon 'couo ieu d'peine à m'assiéthe, sait à j'va ou dans eune tchaîthe! Mes fréthes Sydney, Fraînque et Percy sont Franc-machons étout, et i' pathaîssent pouver s'assiéthe aîsiement. Jé n'crai mème pon qu'la femme d'un Franc-machon sait où'est qué s'n homme fut êtampé, car i' n'li est pon pèrmîns d'dithe lé ségret, mème à sa femme!

L'aut' sé j'liêsais un tas d'choses întérêssantes, pour tout l'monde, entouorre cèrtaines pèrsonnes tch'étaient Franc-machons, dans un bulletîn Franc-machonnique. Par exempl'ye, l'Oncl'ye Tom dé l'histouaithe "Uncle Tom's Cabin" par Harriet Beecher Stowe, 'tait r'connu comme étant lé Révérend Josiah Henson. I' s'était êcappé au Cannada, et est entèrré à Dresden, Ontario, et les sŷmboles Franc-Machonniques sont gravés sus san tombé.

Lé preunmié templ'ye dé Franc-machons au Cannada fut bâti à Niagara par lé Gouvèrneux Simcoe. Ch'tî'là a dispathu, mais y'en a un neu sus l'mème empliaichement.

La musique dé l'antienne nationale dé l'Améthique ("The Star Spangled Banner") fut compôsée par John Stafford Smith, membre d'la loge Royal Somerset and Inverness Lodge, nunmétho 4 à Londres, et l'air 'tait connu en Angliétèrre longtemps d'vant tch'i' fûsse adopté par l's Améthitchains.

Lé pus gros Franc-machon au monde 'tait l'Fréthe Miles Darden. Il avait sept pids, siex pouces dé haut et p'sait pus d'mille livres quand i' mouothit à Lexington, Tennessee, en 1857. I' m'suthait siex pids quat' pouces lé tou d'sa tâle. I' fallait chent pids d'plianches dé bouais pour faithe san côffre, et i' fallait dgiex-sept porteurs pour lé porter au chînm'tchiéthe. Mais sa femme né p'sait qu'nénante livres!

Lé fanmeux Coronel Charles A. Lindbergh, membre à vie dé Keystone Lodge, nunmétho 243, St. Louis, Missouri, avait les sŷmboles dé la Franc-machonn'nie (L'Êtchèrre et l'Compas) sus sa câsaque quand i' crouaîsit l'Atlantique tout seu dans s'n avion en 1927.

Quand l'templ'ye des Franc-machons fut bâti à Chicago en 1892 il 'tait l'pus haut bâtisse du monde dans chu temps-là, et i' fut l'preunmié bâtisse à êt' appelé "gratte-ciel" (skyscraper).

Dans l'temps d'La Révolution Française, la dgilliotinne, eune machine înventée pour coper la tête ès crîminnels, fut faite sèrvi dès 1789 pour l'exétchution des aristocrates et aut' pèrsonnes condamnés par les révolutionnaithes. Oulle avait 'té înventée par lé Docteu Joseph Guillotin, Vénéthabl'ye Maître dé La Loge Fratèrnelle de La Concorde dé Franc-machons à Paris.

Lé preunmié livre Franc'machonnique, les constitutions Anderson, publié en Améthique, fut înmprînmé par lé Fréthe Benjamin Franklin en 1734. Pour lé moent, jé n'm'èrsouveins pon du nom d's loge, mais li et l'Général (et Président) George Washington 'taient fanmeux Franc-machons. Lé Général Washington 'tait Vénéthablye Maître dé sa loge.

J'n'ai pon les dreines statistiques au sujet, mais j'sai bein qu'en 1957 i' y'avait quat' millions d'Franc-Machons en Améthique, et qu'tchînze des Présidents jusqu'à ch't êpoque-là 'taient membres dé l'ordre. Au jour d'aniet y'a 635 loges dans la province d'Ontario au Cannada, auve 125,000 membres du traisième dégré - maîtres machons. En d'ssus d'ch'la, y'a sans doute les Chapitres, conseils, etc,. des pus hauts dégrés.

Sén Altêsse Rouoyale, lé Prînce Philip, fut initié dans la loge Navy Lodge, nunmétho 2612, à Londres en Angliétèrre lé 5 dé dézembre, mil neu chent chînquante-deux. D'aut' membres dé La Famille Rouoyale dans chutte loge-là 'taient feu Sa Majesté lé Rouai George VI et san fréthe lé Du dé Kent. I' fûdrent Grands Maîtres touos les deux. Lé Grand Maître actuel est l'Duc dé Kent d'à ch't heu.

En Vouos dîsant "À la Préchaine" j'env'yis mes salutations fratèrnelles à mes fréthes dans La Loge La Césarée et dans l's aut' Loges en Jèrri.

George d'La Forge
 

Viyiz étout:

 

Les Pages Jèrriaises