A la fin, m'y r'véchin, dans not' chier p'tit Jerri. N'y'avait pon l'mende que j'm'attendais, l'aut' jour sus la cauchie a m'vais dèsbértchi et m'shouaité la binvnue. Sans doute, nou n'savit pon au juste tchi jour que ché s'ait; je n'le savais pas mé même. Tout d'même, j'mé s'ais attendu qu'y'éthait yeu pus d'gens; j'thais creu que bon d'monde éthaient 'té rencontré touos les batieaux pour né pon mantchi la chance de m'vais dèsbértch avec tout man bagage et ma brachie d'sabres. Chinq ou six pettes de cauchies, un matlot ou deux - sans pâlé du Chantnyi Cooke a tchi qui fallait dounné un tas d'resin'ment avant d'poué s'èscappé. Pour quant-a-mé, n'y'eut pon grand embarras. J'sis assez bin counnu, Djeu merçi, pour que nou s'quarre quand j'passe; ma fache est là qui rèspond pour mé, et je d'valli a terre sans seulment avé besoin d'lus montré man passe-port sus tchi qu'était cliutté ma photographie, la couleu d'man nez, la laîze de ma bouoche, et qui fallait laissi l'porteur viagi partout ou-ès qui voudrait.
N'y'avait pon nintou d'moteur a m'attendre; ch'fut entre Laïzé et ma fille que j'tchéthîmes mes casses jusqu'a siez nous - les femmes en d'puthaient d'sueu! En entrant, la preumié chose que j'fit, après qui m'eutes toutes les deux embréchi en plieuthant dans man co, ch'fut d'manji a man tou seu la bouonne steak qu'Laïzé m'avait prépathé, béthe eunne boutelle de biethe, et fait un p'tit soumme sus l'sofa. Et pis, après, nou s'lavi, nou s'chanji, et nou s'en fut au Post châtchi d'main avec le Staff.
J'fu r'chu "on ne peut mieux," coumme i' disent parmi l's officiers Français avec tchi j'ai té dren'ment. Ch'tait "Moussieu Pain," par chin; "Good ole Piteur," par là; "Dounnez mé vot' casaque, que j'pende vot' chappé sus l'cro, assieve-ous sus chutte tchaise, mettez vos pids sus l'garde-feu." Ch'tait tous des bouans garçons, tous contents de m'vaie; faudra que j'dîse a Laïzé d'les invité a bethe du tée - Les siens qui n'sont pon mathiés - quand je s'ons pus séttlés dans nos appartéments.
Après qu'nous eu bin d'vîsé et qui m'eutes apprins lus signes dé francmachon (touos l's escrivains en ont entre yeux), i' m'fites ramonté a haut, dans l'office du Chef. Charmant houmme, le Chef du Post, bin av'nant, et pas du tout a sifaiches; j'm'en vais faithe man possiblye pour lis pliethe.
Après qu'j'eumes séttlé combin qu'j'éthais d'gages et combin d'heuthes i'm faudrait travallyi par jour, i' m'dounîtres un crayon, eunne boutelle d'encre, et du papi, et m'envyîtes bagnaudé en ville, chin-et-là, vaie tchi chang'ments y'avait yeu d'pis la djèrre. Rin n'avait changi, pour dithe! Les gens s'proumnaient dans les rues l'nez l'avant coumme d'amor, les boutiques avaient lus pus belles marchandises dans les f'nètres et les fallyis souos l'conteux, et j'm'aperchu en l'heu qu'la litcheu avait hauchi d'prix mais qu'y'en avait mains dans l'verre. J'apprins étou qu'y'a bri qu'not' milice pourait bin avé a allé au front pour lus aîdji a agvé les Boches. Ch'n'est pas d'mes affaithes de distchuté si l'Gouvernement a l'drouét d'envié nos gens a s'battre hors l'Ile. Mais j'sai bin eunne chose! Ch'est qu'j'en r'vins; que j'n'en sis pas mort, et qu'si Lonore 'tait garçon j'lis m'ettrais yun d'mes sabres dans chaque main, et j'lis dithais: "Vas y, man fiston! Va prendre la pliéche de tan péthe et tâche d'èsmaglyi l'pus qu'tu pouôrras d'ches pamphèques la." I' n'dueuront pon longtemps a ch't'heu: oquo tchiq mais et la Prusse s'a bostée coumme eunne vessie. "We know something," coumme me disait tchiq'un d'haut pliéchi siez tchi j'tais a béthe-du-tée justément d'vant m'en r'vénin.
J'fut èsmérvillyi d'apprendre tchi mouochin d'sous l'Post avé gliénné pour des comforts au Front et a toutes sortes de bouonnes causes. J'en savais déja tchiq' chose. Bin des fais, après eunne niet passée dans les tranchis, dans d'l'ieau jusqu'au menton, j'n'éthais pas yeu d'cauches a chanji, ni de p'tun a feummé, si ch'n'est pour les patchets qui v'naient d'Jerri. Faut continué, bouonnes gens. Nou n'en f'tha jommais trop pour les braves de là bas - j'en laissi oquo pus d'yun driéthe mé.
Piteur Pain
EP 20/1/1916
Viyiz étout: