Fort Lauderdale, Florida,
U.S.A.
Lé 30 de mar, 1974.
Moussieu l'Rédacteu,
Quand j'vai la mannièthe qué les jannes vont à l'églyise habilyis à Dgi l'adèrt ches jours, cèrtains à la c'mînse et atout des braies larges au bas comme les frégatîns, les femmes nueue-tête et auve des courtes robes tchi calengent l'înmaginnâtion, ou des braies d'frégatîn commes les hommes, nou n'peut sénon penser ès vièrs temps quand nou bliatchinnait ses bottes ou souliers jusqu'à qu' nou pouvait s'mither d'ssus, et qu' nou m'ttait ses habits du Dînmanche pour aller à l'églyise, et qu' les femmes n'éthaient janmais pensé à entrer d'dans sans aver la tête couvèrte, viyant qu' nou voulait montrer tout l'respé possibl'ye à l'occâsion d'chanter les louanges du Bouan Dgieu dans Sa Maîson. Sans doute, i' m'reste assez d'largesse d'esprit pour êt' d'avis tch'i' vaut mus vaie les gens habilyis drôlement qué d'les vaie n'aller pon au tchulte, car nou n'peut pon jugi l'monde par lus habits quand veint affaithe dé r'ligion, et i' faut craithe qué l'Bouan Dgieu est du mème avis étout.
Quand j'tais mousse, nouos anciens trétaient la r'ligion auve grand respé, et il avaient des crianches entouorre l'églyise tchi nouos sembliéthaient drôles à ch't heu. Eune crianche 'tait tch'i' n'fallait pon entrer dans ieune atout eune êpingne à sa boutonnièthe, sustout d'la blianche êpîngne. Chutte crianche 'tait probabliément deue à eune supèrstition qué ch'tait mal chanceux d'entrer d'l'êpîngne dans l'églyise viyant qu' la couronne tch'aîdgît à tortuther Nouotre Seigneur lé jour de Sa crucifixion en 'tait faite.
Dans ieune dé ses lettres dans l' “Pilote”, Moussieu Manton dit qué pour trouver l'bonheu dans la vieilléche i' faut mett' dé côté toutes mémouaithes dé rantcheune, aigreu, haine et jalousie. Eh bein, j'avoue qu' dans ma vieilléche j'n'ai pon d'rantcheune contre pèrsonne mais qué j'sis quand-mème jaloux des vielles couôteunmes au sujet dé m'n Élgyise, et qué j'n'aime pon les changements tchi pathaîssent s'însinnuer p'tit à p'tit dans les couôteunmes et sèrvices d'au jour d'aniet. Par exempl'ye, quand j'tais en Jèrri j'viyais tch'il 'taient à faithe sèrvi eune nouvelle et difféthente forme d'sèrvice pour la célébrâtion d' La Sainte Cène. Et j'pense tch'i' y'en avait acouo eune autre à v'nîn. Pourtchi changi l'ancienne forme tch'est dév'nue sanctifiée par l'ûsage du temps et qu' nou-s-a si bein connue toute eune vie qu' nou la sait par tchoeu? Pour attither les jannes? Tchi niolîn! La mannièthe d'attither les jannes est dans l'pouver des pathents. Ch'est d'les faithe aller à l'Êcole du Dînmanche dès lus p'tits jours.
Quand j'y allais y'avait assez d'mousses à l'Églyise dé St. George pour emplyi sept classes dé garçons tchi s'assiévaient d'un côté d'l'églyise, et l'mème nombre d'filles tchi s'assiévaient à part dans l'côté nord. Un vièr diton nouos dit qu' chein qu' nou-s-apprend janne nou n'oublyie pon vyi, et la preuve en est qué quand j'èrvîns en Jèrri en 1946 auprès eune trentaine d'années hors-pays, les pèrsonnes tchi d'meuthaient ès alentours et tch'étaient à l'Êcole du Dînmanche auve mé allaient acouo à St. George au Dînmanche. Malheutheusement, i' n'sont pus à ch't heu. Les dreins 'taient Moussieu et Madanme Fraînque Hacou, née de Caën, et Madanme George J'valyi, née Mary Ann Vibert, tchi mouothit l'année pâssée à 95 ou 96 ans. Quand j'sis là à ch't heu j'dai êt' iun des pus vièrs, si pon l'pus vyi, des membres dé ch't églyise-là.
Un aut' changement tchi m'dêpliais est l'manque dé disciplinne au sujet du sèrvice lé pus important et l'pus sanctifié d'l'Églyise - La Sainte Cène. J'avais tréjous 'té apprîns qu' lé r'pas Eucharistique 'tait si sacré tch'i' fallait lî donner précédence sus touos les r'pas et l'prendre à jeun, la régl'ye étant obligatouaithe pour les jannes et les pèrsonnes en bouanne santé. L's anciens et gens încapacités 'taient pèrmîns dé l'prendre pus tard. À ch't heu, ch'est la mode d'înviter tout l'monde à l'Autel à onze heuthes du matîn et mème au sé. Et ch'est damage tch'i' faut annoncer un “Family Service” pour attither les grand' pèrsonnes à accompagni l's êfants à l'églyise. Touos les sèrvices sont autant - mème pus - pour les grands comme pour les p'tits et sont des sèrvices pour la fanmile.
Quant à la régl'ye dé prendre lé r'pas Eucharistique à jeun, l'Églyise Romaine, tch'était si stricte et disciplinnée l'temps pâssé, l'a abandonnée étout. Nou vait les Mêsses annoncées au sé à ch't heu. Sans doute les fidèles sont supposés aver jeuné pour un nombre d'heuthes spécifié d'vant assister à la Mêsse. Mais oulle en pèrd dans bein des pays dépis qu'oulle a r'lâchi sa disciplinne.
I' n'y a pon d'doute qué l'manque dé disciplinne dans la fanmile comme dans l's êcoles et l'comport des gens généralement est en grand' partie la cause du troubl'ye dans l'monde d'à ch't heu, et tch'i' faut s'èrsoumettre à la grâce du Bouan Dgieu pour y r'miédgi.
George d'La Forge
Viyiz étout: