Le Ménage ès Feuvres,
St. Ouën.
Lé 28 septembre, 1968.
Moussieu l'Rédacteu,
Comme j'l'ai probabliément mentionné d'vant, j'passe man temps à lièthe lé dictionnaithe Jèrriais-Français quand j'n'ai rein d'aut' à faithe, et j'trouve toutes sortes d'choses întérêssantes dédans! En liêsant la définition des corvées à la page 126, par exempl'ye, v'la tchi m'ramémouaithe qué la corvée 'tait un d'vé à la pâraisse. Lé fait qué ch'tait un d'vé oblyigatouaithe né pathaîssait pon êt' r'senti par les parouaissiens. Au contraithe, i' r'gardaient l'affaithe comme étant tchiquechose dé méthitouaithe d'aîdgi à garder les routes en bouan êtat. Les vièrs Jèrriais d'race 'taient bouans travailleurs dé natuthe. I' n'avaient pon apprîns la théorie modèrne dé lé pus d'sou pour lé mains d'travas tchi pathaît êt' l'êvangile d'un tas des jannes d'à ch't heu!
Quant à mé, j'ai tréjous creu qu'l'idée d'la corvée 'tait fanmeuse, et i' m'vînt à l'idée, en liêsant l'compte rendu dans la gâzette entouorre les travaux proposés dans nouot' églyise parouaîssiale, qué touos l's Anglyicans d'la pâraisse dév'thaient faithe eune corvée volontaithe pour lus églyises et prandre la pelle et la chuviéthe et dêgrader ch't'aithe-là tchi m'niche dé s'êcrouôler et d'engaumer l'orgue! S'il' y m'ttaient la main et la pelle dé bouan tchoeu, i' n'prendrait pon longtemps à mett' l'affaithe prête pour la nouvelle aithe, et i' n'en couot'tait rein à la pâraisse.
J'dév'thions tous supporter l'êffort dé nouot' bouan Recteur pour restaurer eune chapelle à l'honneu d'Notre Dame, La Sainte Vièrge Marie. Ch'est seux tch'i' y'en avait ieune là dans l'temps d'nouos anchêtres. Eune chapelle dé mème, à part dé sa signification réligieuse, aîgue à embelli l'églyise - La Maison du Bouan Dgieu - tchi dév'thait êt' la pus belle maison d'la pâraisse! Jé s'sais mème d'avis d'faithe eune deuxième chapelle dans l'but est d'l'aut' allée, et la dêdier à St. Ouën! Dé mème, j'éthions un autel à chaque côté du Maître Autel. Quand nou-s-est assis dans l's allées ès côtés d's églyises, ch'est bein pus satisfaisant d'pouver vaie un autel dévant sé, atout sa crouaix et ses chandelles, qué d'aver à fachi eune muthâle tchi vouos fait fache dé bouais! La preunmié fais qué j'vîsitis l'églyise cathédrale dé York, j'èrmèrtchis tch'i' y'en avait eune douzaine, d'autels, dédans!
Tant pus qu'j'la vai, nouot' églyise parouaîssiale, tant pus j'y trouve des choses întérêssantes. J'ai tréjous admithé l'banc du Mangni d'St. Ou. J'crai qu'ch'est eune mangnifique idée d'aver eune pliaiche tout près du Sanctuaithe pour lé Seigneur du Fief Haubert et Seigneurie d'St. Ouën, lé r'présentant actuel d'une illustre fanmile tch'a 'té associée pour des siècl'yes auve l'histouaithe dé nouot' pétite Île et d'l'Angliétèrre!
Sus les muthâles, nou vait les pliaques à la mémouaithe des fanmiles dé la noblièche dé l'Île. J'èrmèrtchis la cheinne au Coronel Edouard Charles Malet d'Carteret. Il 'tait sus l'siège dé Justice à La Cour Rouoyale dans man janne temps. Et y'en a d'autres étout, à la mémouaithe dé la fanmile tch'a fait La Seigneurie d'St. Ouën fanmeuse.
Ch'est assez r'mèrquabl'ye qu'en liêsant l'dictionnaithe j'ai r'mèrtchi, à la page 127, qué ch'tait probabliément ieune des danmes dé Carteret, née Marguerite Harliston, tch'était la méthe dé vîngt garçons et d'eune fille au tchînzième siècl'ye, tchi 'tait l'auteur du diton Garde ses poulettes tchi voudra - mes cotchets sont à banon! V'la tchi montre tch'i' y'a d'l'humour aussi bein comme d'la noblièche dans la fanmile!
Nou liet des noms, étout, tch'ont malheutheusement dispathu, comme lé nom d'Auvergne. V'la tchi m'ramémouaithe que ch'tait un Moussieu d'Auvergne tch'était Connêtabl'ye d'St. Ouën quand j'allais à l'Êcole Wesleyenne au Haut du Mathais. Eune pliaque, dans l'est d'la partie d'l'églyise tchi s'en va êt' La Chapelle dé Notre Danme, est partitchulièthement întérêssante. Oulle est en mémouaithe dé Messire Philippe de Carteret, Chevalier, Seigneur dé St. Ouën, dé Sercq et d'Rôzé, Lieutenant-Gouvèrneur dé Jèrri. I' fut né en 1583 et mouothit en 1643 au Châté Élizabé qu'il tenait pour le roi Charles premier contre les rebelles comme il est înscrit sus la pliaque! I' fut entèrré dans l'églyise dans chutte carre-là.
Eune aut' întérêssante pliaque est à la mémouaithe du moussieu tchi fut l'auteur dé l' Armorial dé Jèrri, lé livre tchi donne l'arbre généalogique d'un tas d'fanmiles dé l'Île. Ch'en 'tait iun, ch'tî-là, tch'avait des titres d'honneu au but d'san nom! Jé n'm'en vais pon êprouver à vouos les donner tous, ses titres, mais n'en v'chîn tchiquesuns: Il 'tait Commandeur dé l'Ordre du Lion et du Solé d'La Pèrse, dé l'Ordre d'l'Aigl'ye d'Este et Medjidie d'La Turtchie, du Méhan et Iftikar dé Tunis, et du rouai Charles Trais d'Espangne! San nom 'tait James Bertrand Payen Payne. I' fut né en 1833 et mouothit en 1898. San livre est bein connu ès généalogistes.
V'la tchi montre qu'un tas d'Jèrriais ont 'té fanmeux dans lus temps, et ch'est seux qu'nou-s'en vèrrait la preuve en liêsant les pliaques et tablettes monumentales qué nou vait sus les muthâles en d'dans d'toutes nouos vénéthabl'yes églyises parouaîssiales!
George d'La Forge
Viyiz étout: