Coumme gardeux dé bourdons à myi tch'ont rêjui dé not' mêtchi au mains 30 ans j'avons êprouvé à trouver l'histouéthe entouôrre les gardeux dé bourdons à myi en Jêrri. I' n'ya pas fort d'èrcordé au sujet et la preunmiéthe înformation qué j'avons trouvé auve l'aide dé la Société Jersiaise est dans lé livre Caesarea êcrit par Jean Poingdestre en mil siex chents huiptante deux.
Jèrri à chu temps-là était couvert dé gardîns à pommièrs et don les bourdons étaient bein înmportants pour la pollinisâtion et étaient gardés dans pannièrs ou bourdonniéthes en êtrain. Les fermièrs ramassaient lé myi et éthaient fait d'la boisson dé chu temps-là. Y'en avait dé deux sorte, ieune appelée du 'vitot' ou 'vitoé' tchi 'tait bein forte en alcool et don nou disait 'Il est envitoué' d'un homme soul. Et l'autre sorte était du 'bauchet' tchi s'beuvait aussitôt fait et n'sé gardait pas. Tout chenchin devant qué l'cidre devînt populaithe.
Dans l'année mil sept chents chinquante six Thomas Le Maistre des Pigneaux à St Sauveux êcrivit dans san journal, le vingt-tchieune dé Mai; 'J'ai un grand êssaim', lé vingt-trais dé Mai, 'Un autre êssaim,' et lé vîngt-neuf dé Mai, 'Accouo un êssaim, mais bein pus p'tit'.
V'la tchi nos motre qué l'monde tchi gardent des bourdons ont trèjous ieut à souongnyi des êssaims au mais d'Mai et d'Juin, quand y'a trop dé jannes bourdons pour les bourdonniéthes, et don lé vièr diton: 'Un êssaim au mais d'Mai vaut eune vaque à lait.'
Ieune dé nos vielles couosinnes, Marieanne Le Feuvre (née Allix), nos avait dit qu'ou s'ramemouéthait dé quand sa grand' méthe gardait des bourdons à St Aubin dans des pannièrs en êtrain et quand au sé en êté si nou d'cendait lé gardîn nou ouait les bourdons et si i' s'nallaient êssaimyi i' faisaient un difféthent brit comme pour dithe 'à démain, à démain, à démain,' et qué souvent lé prechain jour y'avait un êssaim. La bouanne femme sé rapellait d'aver 'té à la Seigneurie d'La Haule dans les mil huit chents nonante chinque pour vaie les nouvelles bouaîtes en bouais tchi 'taient à être faites servi en Jèrri pour la preunmiéthe fais.
Dans les mil huit chents quarante, la Royal Horticultural Society c'menchi eune clâsse pour lé myi dans ses 'shows' pour des pots en verre dé pinte et dé quarte. Lé preunmié prix était trais ch'lîns et l'deuxiême prix deux ch'lîns.
Thomas Quayle êcrivit dans son livre en mil huit chents tchinze, General View of the Agricultural and Present State of the Island of Jersey, disant que lé myi était brun en couleur, bein êstimé pour son gout et qualité et générallement èrcommandé pour sa granulâtion tchi 'té grand et difficile à copper.
Duthant la Preunmié Dgèrre tchique gardeux dé Bourdons formîtent l'associâtion, 'The Jersey Beekeepers Association', principallement pour aver du chucre pour souognyi les bourdons, car lé chucre était la seule chose râtionée a chu temps-là, mais i' n'en eûtent pas.
Duthant l'otchupâtion dé l'île par les Allemands, les gens qui gardaient des bourdons 'taient bein embarassés. Lé myi était à court parcequ'i' n'y'avait pas d'chucre et don comme lé temps s'passait les medicaments étaient à court étout et les docteurs et l'hôpita étaient les seuls tchi pouvaient donner au monde malade des préscriptions pour du myi. L'associâtion fourni quatre tonnieaux dé myi ès Etats duthant chu temps-là et après la dgèrre les membres èrchûtent chatchun eune lettre d'ermerciéments.
L'associâtion à survetchu et au jour d'anniet les membres lus rencontrent redguliaithement pour distchuter et apprendre pus entouorre un mêtchi tchi lus donne eune grand' rêcompense.
Dépis la dgêrre un intéthet dans les produits naturel du myi a crut et y'a en d'ssus dé chinq chents bouaîtes dé bourdons à myi à ch't heu en Jèrri.
Maurice et Enid Gautier
Viyiz étout: