Monsieu,
I l'iavait Dimanche passai quinze jours, comme j'étais oprès l'Eglise de la Trinnetai, quiquiun me dit que le couosin F.D.C. avait fouotai une manière d'annonce dans la Boëte des Publications pour avertir ses ammins que le Vendredi oprès i s'en allait bailli de sa varvette siès li, et divulgui un manière de sermon sus je ne sais qui; i m'est avis tout de même que quiqu'un dit que ch'tait la Lune et les Etèles, ou sus les môques à mi ... Mais enfin, comme j'connais l'êfant, et qu'il i'a oquo un mio parenté entre nous, je dis à not couosin Thom, que si voulait allait ouïr le breviaire de notre Prédicateu, j'irais ov li. I me promint qu'il irait, car i s'attendait entendre quique chose de fin. I dient sem fit-i qu'il a apprins la phisolophie, le moral, et le physique, et pis il a étudiai étout un grand livre que ches grosses têtes appellent, il m'est avis, quique chose comme ENCÉLICOPÉPIE, là oué nou peut apprendre tout, jusqu'à crère que nou z'est pus savant que tout le monde...." Oprès qui m'eut dévisé ainchin, je lis dis: An, si ch'est de même, j'irai, perdü, ov vous, car i nia rain que j'aime mus que d'ouir un homme qui a le filet bain copai...... Vla qu'est bain; quand le Vendredi au sé fut venu, je nos trouvinmes le couosin Thom et mé la oué not Prédicateu d'vait'nos bailli deux mots. Quand j'arrivi, j'y trouvi une suaie de jeunes drinnettes, et un mouoché de petits ponse-terres qui virepassaient comme si ch'avait tai des lapins. Ah! mes chiers ammins, qui vrédouiollelie ! Nou z'était, ma fé, dit qu'ils taient à joué ès-barres!! Comme je m'faôufillais p'tit-à-la-fés à travers chutte frémilliaire là, craque, iun me fouote un co de talon drait sur la g'ville du pi; une autre petite êfrédollaie s'en vain se rué contre mé, et m'envie quasiment les guérets en l'air. Maouxgré toutes ches squâles la, je gabarri tant et si bain que j'appréchais de l'hus de not couosin F.D.C. quand v'la-t-i pon qu'une jeune hardelle qui me prenait, i nia pas de doute, pour un jeune drôle, car nou ne viyait lerme, pique san bras dans le mein, et qu'menche à marchi ov mé. Acheteu mé, quand je me vis atcherottai par une jeune drinnette, je lis dis, se li fis-je: “Le v'la don une bouanne êfant, vé-t-en ov mé, et ne reste pon ov ches effaruaies là; che n'est pon grande chose qui vaille.” Mais v'la-t-i pon que dans un clyin d'yi, ma drolesse happe la poudre d'êscampette, et feu, la v'la aller comme si le Fortune l'avait enlevaie; "An vraiment nou f'rai, je n'irai pon ov vous, man pouore vi: se m'dit alle, esche qu'ou criiz que j'voudrais être veue ov unne tai vier gris? An, mais nannin dia, vraiement; allez traichi quique vieille sèque comme vous. I n'en fallait pas pus pour me cliore le bé; je ne dis don mou à la hardelle, mais m'appréchi du pas de l'hus, quand nou vint dire que le Prédicateu ne devait pon prêchi chutte seraie la, viyant qui s'attendait que la maintii de Jerri y viendrait, et qui craignait que san parleux s's'ait trop p'tit; et piès chès pillebos éraient douoilli chu biâou tapis et ches fines quères Quand nou zu oui chonna, quiquiun préposi que le Prédicateu nos bâdrait deux ou très syllables de san béecé dehors dans le bel, mais un autre se mint à dire qui faisait de la plyie. J'irions bain dans la grange o mains, se fit un auotre mais nou z'avait mins drainement du grain par dedans, et pas moyen d'y couler seulement une souoris musquine. Quand je vi que notre couosin ne voulait pas nos ouvrir san fieillet, je voulais m'en r'touoné, mais je fus der'ché arrêtai par un mouché de jeunes dévergondaies, qui faisaient tant des morgaches que mé, tout vi que j'sis, je n'pouvais m'empêchi d'en rire. Bétôt l'en vla iune, une petite acherine, qu'est prinse d'un Evredin, et s'appréchant d'une ruêuque qu'était là à s'na main, o li fouote un co, et l'envie les frougues en haôut. Acheteure, i iavait une trivelaine de petites hardelles, oprès de chutte ruêuque qui ne viyait pas ch'qui s'passait, quand bingue et môques à mi furent dans l'aire, i se minrent à faire une telle bourdonnenie que tout le monde scoddi comme s'ils avaient ieu le feu au drière, les uns d'un bord, les aôutres d'un aôutre. Mais bétôt le vla la fille d'un vezin qui fait un brai et crie tout haôut : "Ah, le vla un bourdon qui vaint de me piqui au guérait"!!! Et la vla don qui qu'menche et frotte et gratte san pouore guérai que l'feu n'avait que d'y venin! Eh bain, crériouz bain, Mousieu l'Editeu, qu'au liy de la pliandre, ches mauoxdites antueûles s'égouffirent toutes à rire: "t'a-t-i fait grand ma," se li faisait iune; ouès qui t'a piquie, montre mé, se li disait une aoutre petite cliers z'yers : tant et si bain que quand ou vit qui se moquaient de liy, ou finit par fichi san camp. J'ai oui d'pis qu'ou manqui de se touoné les sens; i ien a mêmement qui dient quou n'en era jamais de bain ; le bourdon la piqui si du que du pas qui va, la veue seulement d'une môque-à-mi est assez pour li bailli les stériques et li faire happé l'liet, la pouore hardelle!!!... Tout de même, ch'n'est pon là des faichons pour la fille ainaie d'une moyenne bouanne maison, d'aller siès lé monde capsidé lus rueûques: va qu'est diversement laid: ah! mais vère dia, i faoût dire la véritai..... oprès avé épiai ma maraie une bouanne volaie, je halli mes caôuches, comme i dient, et m'ôti de la brouiolle. Quand j'eus r'trouvai notre couosin Thom, je li dis: ou z'avez la un biaôu bliu Prèdicateu! ch'est la un biaôu valet qui fait venin les gens, et pies ne peut ouvri l'bé! I devait nos bailli un long libellé sus la création du monde, et bouan Dyi sait qui, et pies oprès i finit par ne dire mo ! Je m'en vais vos dire ch'que j'pense, né, de vot biaou d'viseux, je cré dans m'n idaie que s'il avait continuai, comme mé, à manier la tranche et l'rabot, au lyi de faire sembliant d'étudier toutes sortes de scienches, et d'aller la niet épier les étèles, et blyinqui et bargouêchi à la lune, i nessait pas aussi craqui, comme il est acheteure. I n'se crérait pon un grand homme, un phisolophe, et un physiqueux ; i m'est avis que ch'est de même qui s'appelle - Vere dia, ch'est un superbe pinchon qui s'en va faire de belles avennes atout san bagnaoudin!!! Et quément i n'sait pas quès qui dit, le pouore corps!!!... Ou pouvez compter d'sus, Monsieu l'Editeu, que dès que j'l'érai oui prêchi, je vos en embouocheché, et comme j'ai assez bouanne mémoire, je pouorrai p't'être bain vos bailli quique mots de sa première hérangue.
Ou feraiz bain mes r'commendations à not couosine, vot femme, et à vos chiers êfans.
Vot Serviteu,
BENJAMIN BINAOUD.
Grouylle,
chu 18 Nov. 1848.
Le Constitutionnel 25.11.1848
Viyiz étout: