Fort Lauderdale,
Florida, USA.
Lé 9 févri, 1980.
Moussieu l'Rédacteu,
Ch'est r'mèrquabl'ye dans combein d'circonstances dé la vie qué nou fait sèrvi l'mot esprit. La preunmié fais qué j'm'èrsouveins d'l'aver ouï 'tait quand j'tais tout mousse à l'Êcole du Dînmanche à l'Églyise dé St. George et qu' Moussieu Pépîn nouos dît qué La Sainte Trinneté 'tait Le Père, le Fils et le Saint Esprit, trais Pèrsonnes, mais, comme nouos l'dit lé Sŷmbole dé St. Athanase à la page quarante-chînq dé La Litourgie, La Divinité du Père, du Fils et du Saint Esprit n'est qu'une: leur Gloire est égale, et leur Majesté co-éternelle.
J'n'avais pon 'té bein des fais auve Papa dans la forge dévant r'ouï l'mot. Mait' John Wesley L'Boutilyi, en convèrsâtion auve Papa, lî dît tch'il avait l'esprit trantchil. Quand vînt la séthée au pid du feu, jé d'mandis à Papa tch'est qu' ch'la voulait dithe.
J'pensais, j'lî dis, qué l'esprit 'tait partie d'la Sainte Trinneté. Comment qu' Mess Le Boutilyi peut en aver?
Eh bein, man garçon, i' m'dît, j'sommes tous créés dan l'înmage du Bouan Dgieu, comme i' nouos l'est dit dans l'vîngt-septième vèrset du preunmié chapitre dé Génêse dans la Sainte Bibl'ye; ch'est en tchi nou peut dithe qué châque pèrsonne possède eune partie du Saint Esprit. Quand Mess Le Boutilyi nouos dit tch'il a l'esprit trantchil, v'là tchi veurt dithe tch'il est content d'san sort et qu' sa conscienche est en r'pos. Y'a l'contraithe étout, san doute, comme en toutes choses. Quand un homme est dans la peine, ou qu' sa conscienche lé tormente viyant tch'il a fait tchique dro, nou peut dithe tch'il a l'esprit troublié, ou tch'il a l's esprits bas.
"Pour eune pèrsonne tchi n'est pon bein dans sa tête, nou dit qu' oulle a l'esprit dêrangi, ou l'esprit d'travèrs, ou en êcharpe. Et pour ieune tchi n'est pon bein dans sa tête, et mêchante en même temps, nou dit qu' oulle a un esprit d'python, la sîgnificâtion du mot python, dans chu cas-là, voulant dithe lé démon ou l'dgiâbl'ye. En êffet, iun des mênoms du dgiâbl'ye est 'Lé Malîn Esprit'. Mais pour eune pèrsonne tch'a 'té malade et mêchante dé même, et tch'est r'faite et rêtablyie, nou peut dithe: 'Oulle a l'esprit trantchil à ch't heu qu' ou sait qu' tout est bein'.
"En pâlant d'un homme tch'est întelligent, nou dit tch'il a l'esprit pointu. Tchiquefais y'a des gens tchi son si êcolés et întelligents tchi n'ont pon la pacienche dé t'nîn convèrsâtion auve du monde d'întelligence ordinnaithe. D'un homme dé même, nou dit: 'Il a d'l'esprit comme quatre,' ou 'Il a tant d'esprit tch'il en mouôrra bête!'
"Tchiquefais un homme vouos explyique tchique projet d'travas tch'il a dans l'idée, et qu'nou sait bein êt' visibliément împossibl'ye d'rêussite. Dans tel cas nou peut lî dithe: 'S'ous aviez eune pointe d'esprit' (ou 'S'ous aviez à quat' sou d'esprit'), 'ou vouos y prendréthiez mus qu' ch'la!' Et d'un homme tchi n'a pon fort d'întelligence ou d'saver faithe, nou dit tch'il a l'esprit pointu comme eune brioche cârrée.
"Dans des temps, un homme est si gêné par un rein, ou tchique pétite affaithe dé rein, tch'i' s'crait en embarras, et nou dit qu' ch'est les mauvais esprits tchi l'tcheinnent. Par contre, nou peut aver l's idées tristes sé-même, et dithe à un anmîn: 'Veins m'vaie à ces sé un p'tît brîn; v'là tchi m'cach'cha les mauvais esprits'.
"Quand un garçon a fait tchique bêtise, nou lî dit: 'Où'est tch'est t'n esprit, don, man pouôrre garçon, a faithe d'ité?' Pour un homme tchi n'a pon grand jugement et tchi n'sait pon comment s'graie auve san prochain, ou comment s'prendre à faithe autcheune chose, nou dit: 'I' faut s'en mêfier, dé ch'tî-là - il à l'esprit borné'.
"Pour un homme tchi n'accorde janmais auve autcheune chose qué nou lî dit en convèrsâtion, nou dit tch'il a un esprit d'contradiction. Mais iun tchi prend connaîssance dé chein tchi s'pâsse lé tou d'li, et tchi fait attention à chein qu' nou lî dit a, nou peut dithe, l'esprit présent. Par contre, s'nou-s-est à penser à tchique aut' chose ou qu' nou-s-a l's idées dans la leune au moment qu' un vaîthîn vouos dit tchiquechose, nou s'estchuse en disant: 'J'né pon ouï trop bein tch'est qu' ou m'avez dit - j'n'avais pon l'esprit présent.'
Et quand tu vèrras des blianches papillotes, man garçon, Papa finnit par mé dithe: I' n'faut pon lus faithe dé ma, car l's anciens nouos disaient tch'il' 'taient l's esprits d'nouos vielles gens tchi veinnent nouos r'vaie!
George d'La Forge
Viyiz étout: