Assa, né v'chîn eune liste des bieaux présents tchi nouos fûtent donnés à mé Marie la Pie et au Piêté quand j'nous mathyînmes auve tant d'êcliat y'a bein d's années, mé et li, comme deux pouorres sîmples – ah bah, mais tch'est qué j'sis à vouos dithe, don! ch'n'est pon d'vouos affaithes qué not' ménage, et ou n'y'êtes bein seux pon întérêssis. Disons seulement qué quand j'nouos mathyînmes, li et mé, j'pensais d'faithe un bieau cou et li sans doute, pouorre corps, pensait d'en aver fait iun étou. Et si j'avons 'té dêchus touos les deux, eh bein, mon doue, jé n'sommes pon les seuls, et pis n'împorte, ch'n'est pon d's affaithes à personne, là don! Ou connaîssiz tous l'vièr diton tchi dit qu'y'en a pus d'mathiésqué d'contents. Eh bein, dame, jé l'crai bein, mé! Mais don, du tèrme, tch'est qu'v'là tchi fait à pèrsonne tch'est qué j'crai ou tch'est qu'jé crai pon. Ch'est comme j'dis, mé – qué châtchun s'mêle dé ses affaithes, sapresti, car i' faut bein paître ouêqu'nou-s-est fitchis, et pis étou au but du compte, i' n'y'a si bouon tchithtchi qui n'vèrse!
Mais tout d'même, j'n'avanche pas vite. Assa, nos y v'chîn, chutte fais. Ch'n'est pon une liste compliète,car i' m'faudrait toute la Chronique pour ch'la. A la dreine minnute j'ai décidé d'faithe un chouaix d'deux'trais douzaines des pus bieaux et pus utiles seulement.
Liste d'présents et noms des donneurs ès neuches de Marie la Pie et du Piêté.
| Lé Général Barbe d'Biche | Eune quarte d'aigre d'cidre |
| Moussieu Simon Bênarde | Trais cocotchièrs couleuthés |
| Mess et Missis Ph'lippe Jîngouais | Cravate en souaie |
| Moussieu et Madame Pîntarde | Canne à ieau |
| Mess et Missis Soucique | Un canârien |
| L'onclye Pièrre Pouque | Un trépid |
| L'couôsîn Ph'lippe Quatsou | Pouaison à rats |
| Mad'mouaiselle Souzanne Litcheu | Paîvriéthe en êtain |
| Mdlle Isabelle Toutelaie | Deux livres d'graisse dé hèrnais |
| Mess et Missis Douard Teurlagoule | Eune couée d'oeufs d'bannetinne |
| Moussieu Pînchmé | D's épîles à tête pour haller des vlicots |
| Le Sieur Vidêcopi | Siex têtchiéthes à vaque |
| Mdlle. Mistenfliûte | Deux ballots d'gris papi |
| Cap'taine Lavetafache | Brînge à dents |
| L'onclye et a tante Doûdinne | Deux onches dé sno |
| L'onclye Jeansue | Eune copie du Grand Albèrt |
| La grand'tante Elise | Chînq vèrges d'rouoge flianné |
| L'homme à la femme | Un cârillon |
| La femme à l'homme | Boutillie d'ieau d'vie |
| Mémèe et Pépèe d'la femme | Un êpîndgi à adgules |
| Mémèe et Pépèe d'l'homme | Barre dé savon |
| Lé Recteu d'la pâraisse | Boêtée d'onguent |
| Missis Etèrnuée | Pathe dé souffliets |
| Lé Sieur Bliâsé | Pathe dé guélesses |
| Mess et Missis Blianc'pid | Couvèrclye d'pot à thée |
| Mess et Missis Jaunecat | Boutillie d'huile dé pid d'boeu |
| Moussieu et Mde. Tavelîn | Ticlye en blianc-fé |
| Mess et Missis Gâchafouaie | Rouôlette à pâte |
| Missis Couôtuthée | Boutons pour des braies en v'lous |
| Moussieu Douard Bichot | Un cabot d'sud romethi |
| Madame Elîndgie | Eune coue d'lêzarde pour bouonne chance |
| Mdlle.Eléonore Flianfliue | Démié livre dé galette dé bord |
| Lécouôsîn Frainque Dgéthet | Un couossi en îndgienne |
| Mess et Missis Nièrtchian | Tchulyi à pot |
| Laîesse Fistuthe | Un chipaudé |
| Cliéme Teurco | Boutchet à sale ieau |
| Amice Achéthîn | Un quartron d'cliou (mêlés) |
| Philot Pihangne | Douzaine d'ains à cabots |
| Douard Laitdoux | Pipe en pliâtre |
| Frainque Longnez | Lico à vieaux |
| Jean et Pièrre Pointus | Scabelle |
| Moussieu Pouothé | Médale japonnaise |
| Mess et Missis Jacques Balot | Mouoché à chînq carres |
| Mess Grîngneux | Lapîn d'siex s'maines |
| Madame Julie Lantèrne | Vlique des grèves d'Italie |
| Mde. Rosalie Chingnon | Touffet d'roses à tchian |
| Mess et Missis Tîntamarre | Trappe à souothis |
| Mess et Missis Jean Vithouard | Cassetrol sans hangue |
| Missis Sophie Outarde | Un "vuldgaithe" du japon |
| Mess et Missis Pièrre Fabliot | Une démié mouothue |
| Mess et Missis Jean Foutus | Boêté d'alleunmettes |
| Moussieu Trottîn | Jougue à cidre |
| Moussieu et Mde. Fanon | Pagas en ros |
| Mde. Blianchepuche | Riban d'difféthentes couleurs |
| Moussieu et Mde. Têtue | Siextonnyi d'pannais |
| Moussieu et Mde. Bûzard | Deux onches dé ricolisse |
| Moussieu Cliantchet | Potée d'nièr beurre |
| Mess et Missis Braiebas | Pannelée d'bênis |
| Mess et Missis Piston | Livre d'papilottes (couleuthé) |
| Mde. Pouorreté | Blianc cahouain stoffé |
| Mdlle. Lala | Boêté d'chithe dé bourdon |
| Mdlle. Sopie Touette | Deux douzaines dé grouaisîles |
| Mde. Bouoillie | Bachîn à papa |
| Mdlle. Tapotte | Des craque-nouaix |
| Mdlle. Virginnie Vra | Deux livres et d'mie d'beurre en pot |
| Mdlle. Douocheu | Jarre à rhomme |
| Mdlle. Aigrette | Portrait d'la Chinne |
| Mde. Avrônée | Douze douzaines dé baleines dé cor |
| Mess Chiquetchi | A 4 sou d'graines dé cârottes |
| Mess et Missis Mollepâte | Deux vèrges d'dentelle |
| Moussieu et Mde. Cocotte | Eune livre d'raisîns |
| Mdlle. Vêpriéthe | Eune année d'Chroniques |
| Mess et Missis Galot | Pathe dé lachets en tchui |
| Mess et Missis Tambour | Un dée à couôtre en êtain |
| Mess et Missis Cassebouais | Brînge dé cayas |
| Missis Hachebecque | Cauque-souothis dans eune boutelle |
| Mess et Missis Lavetchîn | Eunne barre dé savon |
| Moussieu et Mde. Chîsafré | Démié douzaine d'êcrouettes |
| Moussieu Calfaîteux | Un mogue en bouais |
| Moussieu et Mde. Toutsmêle | Erchette pour gelée dé m'lon |
| Mess et Missis Chiffonniéthe | Siex douzaines dé bouchons |
| Mess et Missis Cahuche | Boutillie d'corpid |
| Mess et Missis Trie-d'bouais | Deux blianches souothis (mâle et feunmelle) |
| Mess Colimachon | Un tchias dé p'tun |
Viyiz étout: