N'v'chein deux-trais d'vis par mé, Marie la Pie:-
Jé n'vouos ai jamais raconté pour la bordée qu'jé m'mathyis. Ah, sémnâge, ch'en'tait eune bordée, j'vouos garantis! Y'a bein d's années d'chenna, sans doute, appraichant d'une souaixantaine d'années. Car i' faut vouos dithe qué j'tais mathiée gentiment janne, et mé v'là tchi m'en vais sus mes septante-huit, ou est-che septante-neu? J'n'en sis pon trop seuse à tchînze jours dé près, comme nou dit, mais enfîn, y'a tréjous bein longtemps d'chenna. Et l'aut' jour en fielletant des copies d'vièrs papièrs dé chu temps-là (la Gâzette des Bouais'sies, pour nommer l'papi) j'vis l'annonce dé not' Mathiage et tout d'suite v'là tchi m'ramémouaithait d'un tas d'tchi, hélas, dé man janne temps.
Eh bein, j'ai pensé qu'ous aiméthiez pét-être bein ouï eune description dé chu mathiage tel qu'il eut lieu dans la p'tite égise dé Sainte Hirondelle, sus la c'meune des Geonnais au lis d'la mé. Les gâzettes dé nouos jours en éthaient fait un rapport à tchiquechose près comme chennechîn.
"Des neuches aussi belles et aussi împortantes comme nou-s-a veu né v'là longtemps eutent lieu(tel et tel jour, j'oublyie la date exacte) à l'égise dé Sainte Hirondelle, les partis étant Josué l'Piêté fis d'Laïesse lé chiquetchi et Marie la Pie l'héthitchiéthe dé Bram lé vachi.
Ch'tait par un rare temps qué not' couplye s'entrepromîntent la leune, fîtent dé la bête et des niolin'nies, et cétéra, et cététra. L'égise 'tait décorée dé haut en bas et i' d'vait y'aver dans les quat' chents chînquante et tchiques pèrsonnes (pathents, anmîns et accointances) patchies comme des sardinnes et l's uns sus l's autres pour vaie l'spectaclye du jour.
Parmi l's învités distîndgis et pécials nou-s-apèrchut Sa Grandeu l'Général Barbe d'Biche et sa dame, Moussieu Pînchmé d'la Trouss'sie, le Sieur Bibette et sa douinne Poupette, Cap'taine Lavetafache et san bieau-fréthe lé Sieur Vidêcopi, Moussieu Carrous Quéjpasse, Mêssieurs Teurlagoule, Bianfaie, Malaucor, Pliaintuche et pis Mesdames Vithouarde, Malvoulu, Finnegoule, Olympe, Toussicotte et Mistenfliûte, et bein d'autres... comme dé raison.
Le garçon d'honneur 'tait Pierre Potauvin, et les filles d'honneur les d'mouaiselles Pouivette, Sardinne, Poulotte, Paîvriéthe, Chiéthonnée et Suthelle.
La garce, extchusez-mé, la janne fille ou l'amouotheuse, pathaissait supèrbément belle et 'tait habillie dans une c'mînsolle dé satîn couleu d'iviéthe, la cheintuthe souongneusement et délicatement pînchie et l'bas ou robe de l'habillement à banon et traînant chînq ou siex pèrques en driéthe. Oulle 'tait décorée d'pèrles, dé rubis, dé saphires, dé hagues, dé vlicots, et d'pais d'mai. San chapé (tch'éthait fait peux à touos les corbîns) 'tait d'la grandeu d'un bachîn, en crêpe dé Sèr atou un vouaile dé tulle pour lî bouchi la goule - pardon, la bec, et atou des tcheurs et d's oeufs d'bannetinne jutchis sus l'haut pour ornément. Dans sa main ou t'nait un touffet d'lis d'la vallée, d'orchidilésias et d'chîmpanzischizanthèmes.
Quant ès filles d'honneur, ieux étou pathaissaient hardi bein habillies en longs calobres d'vlous (s'i' y'a telle chose!) couleu d'pihangne et châtchun lus chapé d'quat' sou chèrgi d'ribans atou du maniéthe dé fin tramas par dessus pour happer les mouques s'i' y'en avait.
La mémèe d'la mathiée, ou d'l'amouotheuse, nou dévthait dithe, 'tait attîntée atou du bliu chiffon d'georgette et la mémèe du janne homme 'tait montée dans un costeunme dé vèrt blin bâzin auve rouoge et janne chapé à plieunmes dé paon et des cliochettes en argent... ting-aling, ding-a-dong!
Lé galant, li, avait san bouon fa du dînmanche tch'avait 'té env'yé à netti siez la fétherêsse pour l'occasion. Il avait cru eune moustache (y'avait deux'trais mais) pour tâchi d'bouchi sa bouochie d'dents gâtées et pour empêchi l'jus d'san tchias dé p'tun d'lî couorre avau la varvette.
La cérémonie étant finnie lé galant et sa èrgère, les pathents et anmîns et un tas d'învités s'en fûtent à l'Hôtel des Stégrîns ouêqu'la réception eut lieu et ouêqu'la gâche fut copée et les santées à tout l'monde et lu p'tits fûtent proposées et bues.
La leune dé myi étha lieu au Pole Nord ou tchiquebord là-haut, et les mathiés es-sont six ou sept mais hors ou même pus, et s'i' lus y pliaisent hardi p'têt' qu'i' n'èrveindront pon du tout!
Les habits d'la mathiée, d'la méthe et d'la belle-méthe et des filles d'honneur ont 'té faits par la couôtuthiéthe dé r'nom Lisabé Dèrneuse; touos les supèrbes touffets d'flieurs ont 'té tchillis sus la falaise d'la Dgiâbliéthie, dans les prés et l'long des r'liés, et la gâche à dgiex êtages tchi p'sait quâsi trais-quart dé tonné a 'té fournie par la Maison La Pouaisse.
Acheteu y'a eune longue liste d'bieaux présent. Mais jé conte qu'i' vaudra mus laîssi ch'la pour un aut' jour. Ch'est en tchi, n'mantchiz pon la Chronique les préchaines sémaines s'ou voulez un compte-rendu d'nouos présents et des cheins tchi nouos les fîtent!
Marie la Pie
Les Chroniques de Jersey 4/10/1941
Viyiz étout:
