Les Pages Jèrriaises

Ermâtons nous Garçons!


Ermâtons nous garçons, gardons n'oute nom à haut!
Montrons à nos vaisins q'je n'sommes pas des nigauds,
R'appelous q'les St. Ouennais ont tai dans t'uos les temps
Se en paix ou guerre, tréjous les pus vaillants!

Ou savez bein q'nos pèzes, s'uos l'cmandment des d'Carterets
Se battaient comme des lions et jamais ne r'culaient
Et si dans n'oute Milice, je sommes au premier rang.
Ch'est un droit q'nos anchêtre ont gangni vailliamment.

Ou zavez oui pâlé d'la bataille de Jerri,
Quant Rullecour et s'narmée pensaient n'uosenvahi,
Qu'ant y fuze dèberquis et q'nou sonni l'alarme,
Che fut n'oute régiment qui fut l'prumi s'uos l'sarmes.

Et pis quand tout fut prêt y s'en fuzes au pas d'charge,
Et se rendize en ville avec armes et bagages;
Q'uand y fuze arrivais n'ou l'senvyi est roquettes,
En attendant l'ennemin, à mangi d'la galette.

Quand ils euze bein mangi au pi d'lus Etendard,
S'uos le c'mandement d'Chesnel et du majeur Rïcard,
Le Corannel lus dis, soudards du Number One!
Ne v'chin v'nin des nouvelles et je crai qui sont buonnes.

C'hetait une flaigue de trousse qui v'nait pour lus apprendre
Que toute l'armée française était reduite en chendres,
Q'nou criait Rullecour mort ou parmi les blîaissets,
Et l'reste des Normands étaient t'uos enfrummés.

Q'uand nos gens ouîdre ch'la, ils t'aient comme des arables,
Et y s'mindre à poussé des hourras formidables,
Quand tout fut bein fini, y r'touennidre siez ieux,
En chantant la victoize de lus jour glorieux.

D'pis chu jour là, Saint Ou et san biau régiment
Ont tréjous tai et sçont tréjous au premier rang,
Si par hâzard qu'ique lâche cherchais à n'uos l'ôté,
J'lus montrezions bein vite si j'puorrions bein l'gardé.

Si nos pèzed ont tai baves ch'est un honneur pour nous,
Y nos laisse un exemple que je d'vons suivre tous;
Et j'sommes bein décidez à marchi sus lus traces,
Je montrezons que j'sommes, de Saint Ou, la vielle race.

Si dans l's'arts et les sienches, je sommes tréjours, raide bons
Ch'est qu'e chest d'Londres et d'Paris que j'prénons nos leçons
Mais dam pour le commerce comme pour l'agricultuze,
T'uos nos vrais pâraissiens hézite de ch'la d'natuze.

Ch'nest pas bein étonnant q'jenséyons les beinvenus
Dans t'uos les grands pays, là oues que j'sommes connus;
Ergardez pour exemple n'oute vier Chentegni Bilo,
Comme est qui fut erchu siez l'president Carno?

Car Bram n'avait jamis, ni li, ni sa bouanne femme,
Mangi d'si bou'an pizo, ni bu d'si b'ouanne champagne,
Ch'tai la q'noute Chentegni su gardé n'oute nom à haut
Et montré qu'a Saint Ou, n'ou n'connais pas d'nigauds.

U.D.D.

 

Viyiz étout:

 

Les Pages Jèrriaises