Les Pages Jèrriaises

Es Armes!


Jerriais! Début, de suite. - Coumment? Dorm'ous
Au mitan du tintin autuor de vous?...
Des temps qui vont, - dites-donc: coumment s'fait-i' -
Eche qu'ous êtes sourds, ou aveuglis, - ou qui, -
Qu'ou n'buôgis miot, mais tout buonnement restais
Les bras croisis, les ouies et ziers freumais?
Jerriais - début, bein vite!
Es armes, ès armes de suite! -

Jerriais! nou m'niche not' glorieuse mère-Patrie!
Or, qui la m'niche no's m'niche, nous autres, ses fis!
Les anciens feux sont rallumais! - Et - 'las -
La Paix, tout éplieurée, file à grands pas! -
Et tôt, si, comme tout l'dit, la Guerre apprèche,
I' se peut que l'canon rounn' raide à nout' hèche...
Jerriais - début donc vite!
Es armes, ès armes de suite! -

Jerriais! Attendr'ous pour entendre le cri
“Le Pirate sus la mer est emberqui”
Pour fortifier vos côtes? vo's préparer?
En CORPS DE VOLONTAIRES vo's enrôler? -
Attendr'ous pour quiq' Loi formelle pour ch'là?
Dieu vo's en garde! car donc trop tard che s'ra!
Jerriais - début donc vite!
Es armes, ès armes de suite! -

Fis des braves viers que Peirson m'nit si bein!
Qu'eq' vos pères f'raient s'i s'taient en vie anien? -
Chacun s'rait à son poste! Chacun sairait
Déja SA pliaiche - de danji' ou de d'vé!
O faites coumme ieux! afin d'nêtre pas surprins -
Je n's'rons qu'alors à l'abri d'nos en'mins!
Jerriais - début donc vite!
Es armes, ès armes de suite!
 

Viyiz étout:

 

Les Pages Jèrriaises