Quand j'te counnus d'abord, j'te trouvi bouanne et saine,
Blianche coumme du lait caill'yi et belle à faithe envie,
Tu'étais p'tite et modeste et pas l'mains du monde vaine,
Et j'espéthais qu'ensembl'ye je passéthions notr' vie.

Hélas! Tch'est qu'ch'est que d'nous? La vie n'est qu'une fumée!
- Mess Bisson l'a êcrit chent fais dans la Gazette -
Attachis l'un à l'autre après autant d'années,
Il est du d'en v'nin à la s'pathation compliète!

Mais ch'est fini ach'teu. Jamais pus dans chu monde
Je n'nos r'trouv'thons ensembl'ye, à mains d'un grand mithacll'ye;
Tu m'as laissi un vièdde, ov une douleu' profonde
Et je n'me reconnais pus dans man pouorre habitacll'ye.

Pourtant, ch'nest pas ma faute, mais j'ai yeu tant d'tortuthes,
Tu m'as tant fait souffrir que j'n'y pouvais pus miette,
Enfin, j'ai consenti à la triste ruptuthe
Par la main du dentiste et ses pus grand' pinchettes!

Elie