|
J'avais oui dithe que l's Etats s'étaient réunis
Pour distchutter un sujet de supreme importance,
Chenn 'tait pon la langue officielle, ni l'système metrique,
Ni les finances, ni l'entrée du fain d'France,
Ch'tait un sujet hélas! qui nos tchien pus à tcheu,
Qui nos touche de pus près et tant les p'tits qu'les grands,
Car nos deux Docteurs-Juges avaient mins d'vant l'Etats
Un projet d'loi sus les Eracheurs de dents!
N'vos étonnez don pas si chest qu'Jeudi au ser
J'avais donné un sou pour aver l'British Press,
Ch'tait d'dans que j'lut chu p'tit paragraphe la
Qui m'rempl'yi d'joie: j'admithi la sagesse
Dé nos légistes, qu'avaient, enfin, fait d'bouan travas
Car j'criyons tous que l's'eracheurs de dents
Nos ont faits crier tant qu'ch'est bein not tou
A prendre notre r'vanche - et qu'il en est grand temps.
D'même à l'avenir, en allant siez l'dentiste,
Emportez l'Press d'Jeudi vingtchun Janvi,
Faites li bein vaie la loé et pis dites li: Man vieux,
Prends tes pinchettes, exerce tan metchi
Mais comprends bein qu'd'après not nouvelle loi
I faut qu'tu'érache des dents, mais en même temps qu'tu paie
A vingt chinq Louis d'amende ou bein si tu n'veurs pas
J'men vais t'faithe mettre au cachot pour trais mais!!!
Jock
27/1/1904
|
