S'il n'y a pus d'élections en la paraisse de St. Ou et que l'affaithe parait morte au point d'veue politique, il y a dans chutte paraisse une djingue d'jeunes corps qui éprouvent à revilletonner nos gens.

Il y a mus éttouot car viyant qui s'en vas y avèr un concours d'musiques l'année tchi tchi vint, nous a formé une band qui parade la paraisse à touote heuthe d'la nièth, chein qui n'fait pon plaisi à touos, surtouot ès siens qui vont lus couocher d'buonne heuthe couomme les poules!

Les artistes de chutte band sont Lico, Paddy, Fred, l'bugler et autres. Et l's'instruments sont des soufliets de deux ou quatre sous de sièz Wollworth ou ailleurs, une tine à galettes, viède, bé seur, un clairon d'mousse et autres dithèts instruments.

Mais d'pis trais ou quatre jours chutte band n'parade pus la paraisse viyant que nos musiciens sont à pratichîs une autre tchune.

Ch'est qu'il l'arrivi l'autre sé, près du Champ Donné, nos musiciens jouaient si bein que les navets s'mirent à danser de jouaie et y dansites tant et si bein qu'en p'tit temps il y en ieut un moncé aux pids d'nos musiciens qui auraient pus en rempli tchiques bingues. Malheutheusement ieun de ces navets ieut la maladresse de pitchi en plein sus la fache à Fred et ly fit un tel cliaîn d'oeil que le lendemain l'pouorre baloque avait chut oeil gros couomme une concombe!

D'pis nos musiciens pus parader la paraisse mais mé j'crais que ch'est viyant qu'ils sont à praticher une chanson du vièrr temps pouor faithe plaisi ès vieux d'la paraisse. Et chutte chanson est: Two lovely black eyes! Oh! What a surprise!

Il y a éttouot d'autres qui lus exercent pouor la préchaine djerre en peltant des navets sus les siens qui passent et qui n'lus pliaisent pon.

L'autre sé, pouor une bordée d'fun, il y ieut du feu de satchi!

Ch'est que pouor avèr des fireworks à buan marchi une p'tit djingue décidi d'mettre d'vieilles gazettes dans un nô et y mites l'feu mais l'bouais du nô était si sec qu'il prins feu! Heureusement nous s'rendit bé vite Maistre du Feu, car qui aurait pus avèr les ch'veux “Corlés.” Et ch'est des fireworks d'un autre genre qui futes tithèt au parish hall par ieun des grands d'la paraisse, car ch'n'est pon des farches à faithe.

J'ai oui dithe éttouot qu'l'autre sé, ieun des grands d'la paraisse tomba dans la route du Marais viyant qu'il n'vit pon une corde que des gamins avaient tendu en travers la route pour faithe tchès les siens qui passeraient. Que ces mauvais sujets prennent garde à ieux, car n'v'la qui pouorrait bein lus jouer un mauvais touor, fouai de Marie Hibou qui en sait un p'tit pus long.