Les cheins tchi m'connaîssent savent qué j'sis tréjous à baithe d'ênormes modgies d'thée - du thée feunmé Lapsang Souchong, ou du Comte Grey, ou du thée au jasmîn. J'aime lé thée, mé!
J'fus divèrsément întérêssi don quand j'trouvis eune vielle articl'ye en Jèrriais en liêsant des vielles gâzettes à la Bibliothèque. Ch't' articl'ye-chîn 'tait entouor la dithie d'chance dans la tâsse et explyitchait l's întèrprétâtions des formes laîssis par les fielles dé thée. Jé n'saithais pon dithe si chenna marchéthait auve les pouques à thée d'au jour d'aniet!
S'ou viyiz un ouaîsé dans la tâsse, ous éthez un bouôn viage ou ous èrchév'thez eune bouonne nouvelle. Eune tchaîse prédit eune longue vie, et eune clioche veurt dithe qu'i' y'étha un mathiage à v'nîn. Mais eune maîson tch'appathaît dans la tâsse sîngnifie du hèrtchîn.
Si ch'est qu'ou viyiz eune pelle, ous allez dêcouvri tchiquechose tch'est muchi, et eune leune peut prédithe du bieau temps (mais en tout cas i' vaut mus liéthe la prédiction du temps dans la bouonne vielle gâzette).
Vaie un baté veurt dithe la bouonne chance, sustout pouor les pêtcheurs.
Mais mêfi'-ous d'eune pathe dé soûffliets, car chenna veurt dithe la pouôrreté! Jé n'sis pon seux, mé, si j'èrconnaîtrais eune pathe dé soûffliets dans la tâsse, mais l'articl'ye coumme dé raîson né mentionne pon les choses modèrnes.
Tch'est qu'chenna veurt dithe don si nou vait un téléphone dé pouchette, ou eune carte à sou, ou eune plianche à rouôlettes? Probabliément, ch'est qu'vot' pouque à thée a bosté!
Viyiz étout: