|
Connaissous une vieille coquette Vieille comme la rue d's alleurs, Qui s'donne des aurs de drinette, Qui fait etou de divers teurs. Ou fait mettre devant sa tête Une espece de gros bibi; Et même certains jours de fête Ou le fait porter devant lli. Tantôt les uns tantôt les autres Montent la garde ov le bibi; Nouz a pitqui des puors apôtres Tormentés de faim et d'engni. Mais ch'est lus dver quand la couronne Est deut de la bein garder; Ch'est lus tâche, la louai l'ordonne, I' faut l'faire sans murmurer. Deux fais par an des hallebardes Sont rangis de chaque côté, Tandis qu'atou de belles hardes Les gens de Cour font le trajet. Les uns ont une ruoge robe, D'autres une robe de ner: Le ruoge couvre l'homme probe, Le ner... je vous laisse à dviner. D'la sorte en grand cérémonie, Depis la Chambre du Bailli Entre de soudards deux rangies, Nou fait porter le biau bibi. La chose a fort belle apparence, I' n'y manque pas de l'ècllat; Quand l'huissier a crié: "Silence!" Nou n'entend pus ni cllin ni clla. Nou cmenche par une priere, Qui merite toute attention; Et oprès nou dit "Notre Père," Ov pus ou mains de devotion. Ch'est chein qu'nouz appel l' "Assise," Devant qui certains grands Seigneurs, Le Cmandant pour les gens d'eglise, De divers fieux font les honneurs. Et pis oprès pour montrer comme Dans chu monde ichin chacun ment, Les Avocats, comme un seul homme, Devant la Cour prêtent serment. Lus memouaire est hardi traitresse, Autant comme j'en peux jugir, Car maugré serment et promesse, I' lus faut trejous rquemenchir. Les Prevôts et Sergents d'la Reine Sont là pour rêpondre à lus nom, Et pis les Officiers d'la Reine Lliesent sa Proclamation. Mais le pus be de la journée Est le diner orné de flleurs, Que dans l'cuorant de la sérée La Reine offre à ses serviteurs. P.L. 22/12/1876 & 4/10/1877 |
Viyiz étout: