Ah! secours de la vie!
J'en sie toute ravie.
Erait-on jamais creu
A t'on jamais veu!
Oh! dame chut bouone fais,
N'ia câ que je connais
Qui n'mouorrais pon d'peux,
Et en érait quique bond
De s'vais au mireux
Trufai comme les hommes d'âcheteu sont.

Crignies et barbues
Y s'trainent par les rues
En r'drechant lus têtes,
Et semblant vos dire
"Oh! ch'nez pas pour rire:
Ou ne l'ériez pas creu
Mais ove respect d'vot honneu
Je sommes acheteu de vrais et lais bêtes!"

Ouêqu'il ont t'ai pêqui
Un tai sorte de maîqui,
A s'barbouilli l'nais
Et s'mettre aussi lais.
Et chéqu'ils les portent
Fachionnais de toute sorte,
Erdréchies, écalais,
Toufues, draits, et corlais.
Nair, rouoge, et pilais
Tous graissies et tralais.
Oh! ches de fière saloperie.
Que chute lais moustacherie.

Vère, j'my tiens, et j'el dit,
L's hommes ont perdu l'esprit,
D'aller jouer à la gamme
D'éfriter les femmes,
Cryiant qu'les D'moiselles
Lus f'ront les doux yeux
Parcequi tâchent de faire péux
Ès pus nobles, ès pus douches, ès pus belle.

Là, cliutais ès carres,
Chès qui s'craient de qui rare.
Quand y son à corlé,
Ove le p'tit but du dé
Chès mios de crigne tralais
Stiqués souos lus nais.
Faut q'ches hommes là sês d'manière de fôs!
Oh! y faudra avé
Pour y considéré
Une assembliais d'paraisse au pustôt.

Cher doux écoutais,
Ove ditai sous vot nais,
Ou sembliais d'si près
A ches pouore marmousés,
Q'nou devrai avé
D'la ficelle et vos lié,
Ai pis vos promené
Tinfais en d'qui bé,
Et vos faire, en bieaux clus,
Dansé par les rues,
Ove quique chier p'tit garçon
Pourvos dire vot leçon,
Et vos faire faire des teurs de messieux,
Et cheque donc aitou,
Ou zy gagneriais des sou,
Et les Dames n' éraient q'faire d'avé peux.

Nenné Caton