Le Chef me dit l'aut'e jour que la Chronique d'annièt ne s'sait pas compliète si ch'est que l'Caouain n'êcrivait pas s'n articlye usuel souhaitant un bouan Noué à touos ses lecteurs.
J'eûmes quâsiment du brit par là d'sus, car j'avais comprins mé, que les Directeurs m'avaient bailli un mais de Christmas Holidays et que je n'tais pas supposé de travailli.
Et pis quand-même, comme je li dis, nos lecteurs ont autre chose à lus otchuper les idées à chute saison ichin sans vouler être embêtés par une répétition, année oprès année, des “Merry Christmas” au Caouain.
“Ch'est la piercheusté qui l' tchaint!” qu'i' raîponni, et j'insiste que tu êcrives comme d'habitude ou bain je m'en vais baîlli ta job à un autre!”
“Eh bain, faites-lé!” je li dis, “payiez-mé chein qu'ou me d'vez et je sors d'ichin à la fin d'la s'maine!”
Je ramonti à haut et j'dis à Marie Hibou, “Paques not'e butin tout-d'suite, j'allons dêcamper d'ichin!”
Ou s'appréchi d'mé et me r'gardi dans l's yiers, une habitude qu'oulle a, quand je rentre sus l'tard ou que j'pathais upsetté.
“As-tu dêjà c'menchi à fêter Noué?” ou me d'mandi.
“Nennin,” j'li dis, “mais y a trop d'maîtres ichin et je n'sais bétôt pus sus tchi pid danser! Je vains de donner une semaine d'advertissement au Chef et chute feis je sis dêterminé d'aller cherchi ma fortune ailleurs!”
“Et tch'est qu'tu cré qu'tu t'en vas faithe?”
“Oh!” j'li raîponni, “i'y a pus d'maisons qu'd'eglyses, et y a bain du ma si ch'est qu'un ouaîsé comme mé avec mes capacités et ma réputation, ne peut pas trouver de l'empliai ailleurs. Je sis seux que “l'Jersey Critic” ou bain “l'Morning News” es'saient bain contents de m'aver sus lus “staff,” et je m'y en vais tout dret lus dithe que mes services sont à lus disposition.”
Ou ne r'dit pas un mot mais ou d'valli en bas et deustrais minutes opprès je la ouï ervenin, suivie par le Chef, qui me d'mandi extchuse et s'mins à murmuther tchiquechose entouor “Peace and Goodwill” et je n'sais tchi, si bain au but d'chinq minutes j'étions à châtchi d'main et Marie Hibou dêhalli sa bouteille d'ieau d'canelle et nos en versi châtchun not'e petit verre.
Je trintchîmes, et nous entre souhaitîmes un “Merry Christmas” et don nos r'velà, comme disent les soudards angliais, “as you were.”
Conséquemment, mes chiers lecteurs, permettez-mé oquo une feis de vos faithe les complîments d'la saison. Je vos r'mercie d'avé ieu duthant l'année, tant d'patienche avec mé, et d'aver lu tout man niollin sans vos pliaindre une seule feis. Tchiqu'uns d'entre vous m'ont tchiquefais complimenté et m'ont dit combain qu'ils appréciaient mes articlyes, et bain, je vos asseuthe qu'un p'tit encouothagement comme ch'la rêjouis l'tchoeu d'un pouore journaliste, sustout quand ches complîments-là vainnent de la part de gens haut pliaichis aussi bain que d'la part des pus humblyes ouvriers.
Car le Caouain se felicite qu'i' peut compter parmi ses lecteurs la plûpart des Membres d's Etats, un grand nombre d'Ecrivains, quâsi touos les Chant'niers et les membres de la Police Honorifique, une grande majorité des fermiers de Jêrri, aussi bain comme les travailleurs qui sont à lus empliai et même les hommes qui travaillent sus les routes. Et pis i'y a oquo des douzaines de lecteurs dans toutes les parties du monde qui n'voudraient pas mantchi de r'chever lus Chroniques toutes les s'maines.
A tous, riches ou pauvres, p'tits ou grands, le Caouain offre ses miyeurs souhaits pour Noué et pour la Nouvelle Année.
J'espèthe que Djaix-Neu-Chents-Vingt-Chinq es'ra une année de prospéthité pour tous.
Une bouanne saison d'patates pour les fermiers de la campagne, une bouanne récolte, pas d'maladie, et des prix satisfaisants.
Chenna garanti, i' s'en suivra que les commerçants d'la Ville prospeth'ont ettou et, avec une forte invasion de visiteurs tout es'sa “couleur de rose” oquo une feis.
V'là don mes chiers amins les voeux les plus sincéthes du CAOUAIN.
Caouain
1924
Viyiz étout: