Ou vos r'souvaindrez bain que l'aut'e semaine je vos dis que j'avais mantchi ma montre quand j'me l'vi le matin des courses.
Eh bain, j'étais tout-à-fait convaintchu qu'oulle avait crouaîsi l'ieau dans la pouchette à tchique voleux de Birmingham ou aut'e village comme chenna ouest qu'ils êlêvent toute la râcaille qui vaint ichin touos l's ans pour tâchi de pliumer not'e bouan public.
Mes soupçons 'taient tout-à-fait mal fondes, et je veurs profiter de ch'tte occasion ichin pour offri à ches messieux-là mes pus sincéthes apologies pour aver pensé, même pour une minute, qu'ils aithaient voulu faithe patheille chose.
Je sis enchanté de pouver vos dithe annièt que j'ai r'trouvé ma montre.
Et pus qu'chenna, j'ai trouvè l'voleux, ou ch'est-à-dithe, la voleresse.
Pensez-don que hier matin quand j'étais à m'habillyi, en cherchant pour mes gêlesses, j'adonni à r'garder à la tête du lièt et tch'est que j'vi, pendue à san cro à pliaiche d'amor, sinon ma montre qui marchait à merveille et qui mertchait djaix minutes de sept.
Je n'pouvais pas craithe mes yiers et je la dêpendi bain douochement et l'examini pour me faithe seur que ch'tait bain lyi.
Oulle 'tait bain r'connaîssablye car le driethe est tout martélé dépis la bordée que iun des p'tits caouains la fit servi pour cratchi des nouaix et y a des grimeuthes sus l'verre que Marie Hibou fît en cherchant à dêcouvri si ch'tait un réel diamant qu'était sus la bague que j'l'y avais donné.
Vaithe, j'étais bain seux qu'i' n'y avait pas d'erreur.
Ch'tait bain ma vieille montre que je t'nais dans ma patte!
Mais comment qu'oulle 'tait v'nue là?
J'avais biau penser à toutes sortes d'théories, ch'était au d'sus d'mé tout-à-fait. Je n'pouvais pas arriver à autchune solution du problème.
Je m'décidi de rêvillyi Marie Hibou.
“Tch'est qui te r'faut?” qu'ou m'demandi, “Tu n'as pas pus de considéthation pour mé que de m'rêvillyi à l'heuthe qu'il est opprès qu' j'ai passé une partie d'ma nièt à t'laver tes chiques? Laisse-mé trantchille peûle que tu ès!”
“Ne t'mârries pas ma chiéthe,” je li dis, “ergarde, ma montre est r'venue!”
“Ta montre? Ervenue d'iou? Absolûment ch't ouaisé-là a perdu la raison!”
Nouffait, nouffait j'n'ai pas perdu la raison, mais j'avais perdu ma montre i'y a quâsi tchinze jours, et v'là-t-t-i' pas que j'la r'trouve à matin pendue à sa vieille pliaiche, sus san cro à la tête du lièt! Y connais-tu tchiquechose té?
Mais ou n'me raîponni pas. Ou s'était ertouânée d'bord, et fit la mîne de s'rendormi.
Chenna m'fit marri, mé, et je m'mins à la châtchi, déterminé de sonder l'mystèthe jusqu'à fond.
Ch'n'est pas tout chenna, j'li dis, ch'est une chose sérieuse chennechin et si tu r'fuses de m'aidgi à en trouver la solution il est bain êvident que ch'est une affaithe pour un détective et je m'en vais tout d'suite ramasser l'Chantn'yi Cabot!
Et j'ouvri la porte d'la mansarde et j'fis la mîne de m'en aller avau les d'grets.
Chenna fit peux à Marie, et ou m'criyi: Caouain, vaint-en ichin!
Quand j'rentri ou m'dit comme chenna, “Tu n'est pas content de la r'aver en ta possession, don, ta montre?”
Mais si fait, je n'l'athais pas perdue pour autchune chose.
Eh bain tu peux r'mercier l'Bouan Djeu de t'aver donné une femme comme la sienne que tu as. Si je n'avais pas ieu l'bouan sens de muchi ta montre la séthée de d'vant les courses, ou s'sait acheteu dans la pouchette d'un voyou de tchique carre en Angleterre!
Ch'est p't-être bain vrai, ma chérie, je li raîponni, mais pourtchi que tu as té si longtemps devant que de me la r'donner?
“Et pourtchi qu'tu as 'té si longtemps sans m'dithe que tu l'avais perdue, té?”
Je n'sus pas tchi li raîpondre.
Ou viyiz, si je li avais dit que j'craignais d'être gronné, v'là qui li aithait donné à penser que j'avais peux d'lyi.
Et je n'veurs pas qu'ou craie chenna sus autchun compte.
I'y a des moments que je sis mârri à lyi pour m'aver joué une telle farce, et sus l'aut'e sens, je n'peux pas sinon penser que ch'est grâce à ses précautions que j'n'ai pas ieu à acater une autre montre.
Et je vos asseuthe qu'au temps qui va, je n'en aithais pas ieu l'moyen.
Caouain
1924
Viyiz étout: