Ch'n'est pon des menteries ni des sornettes mais la pure, plaine et entièthe vérithèt et chunna s'passi dans la paraisse au Captain qui n'a jamais été en mer.

J'avais oui qu'il s'en aller aver des neuches dans chutte paraisse mais que nous n'voulait pon faithe de fuss et n'v'la pouortchi que nous n'voulait pon dithe la date.

L'prumie Samedi de l'année, ayant ieu vent de préparatifs pouor chu grand jour, couomme j'm'en r'venais d'une paraisse du Nord, je me jutchi sus l'chatgnier de l'Eglise pouor rester ès écoutes étant d'avis que tchique chose aller s'passer d'vant longtemps.

D'ver neuf heuthes du sé, j'oui une vouaie s'faithe : Hello, Charlie, mais je n'dis pon grand chose car j'aperchu un homme avec une arme chargie et ma fé j'n'aime pon fort chès gens là, viyant que tchicque fais, sans l'vouler, y pouorraient p't'être me tither.

Grande fut ma surprinse quant j'vit Charlie qui allait à raide braches sièz l'Recteu, portant avec ly un alarm clock! ver et un alarm clock avec un fort carillon!! Tchès que chunna veur dithe, que j'm'dis car pouor seur ch'n'est pon pouor remplachi l'sonneur des clioches pouor demain.

Ma fé, couomme j'sis un miot tchutieuse de ma sorte, à tire d'ailes me v'la au Rectorat d'vant Charlie et j'tais mucchi dans l'aie du foyi quant Charlie entri.

J'savais bein que Charlie était fermi mais j'n'criyais pon qu'il tait èttout horlogi mais faut craithe que ch'est d'même car y Montri à Moussieu l'Recteu couomment faithe marchi le carillon et je l'vit touorner la petite aidjuille sus sièz heuthes et s'faithe :

Achteu, n'v'la qu'est all right, vous pouorrez dormir sus vos deux oreitheilles car pouor seur la carillon vous réveillera à temps - ou tchicque d'vis d'même et ch'est que chu carillon en était ieun bé fort, viyant que Moussieu le Recteu est un miot dure d'oreille.

Quant ils taient à d'viser, ils entendites du bruit en dehors et ma fingre quant Charlie sortit, bang, bang, il y eut d'la titherie et Charlie vit tchais sus ly assez d'riz pouor faithe un podin s'il avait ieut l'temps d'l'ramassi. J'm'en voli bé vite hors d'la vaie et j'alli m'jutchi sus ieun des gros ormes d'la paraisse n'dormant que d'un yièr pouor être seur de ver chein qui allait s'passer.

D'ver quatre heuthes au matin j'oui un freddas couomme si des briques v'naient de tchais dans la chuminée et j'vit de la veue allant d'une chambre dans l'autre.

Un p'tit oprès, deux fortes veues m'firent grand peur. Ch'tait un motor-car qui s'arrêti oprès des grands ormes et j'vit nos gens monter dedans.

Pendant chu temps, au Rectorat l'carillon faisait un tintamarre assez pouor réveilli touot l'vaisiné!

Enfin, n'v'la l'motor car qui s'met à faithe des teuf! teuf!! et l'v'la hors avec mé jutchie sus l'bonnet! Nous passi l'Eglyise, pouor aller sièz ieun des grands d'la paraisse.

J'oui Ern y s'faithe: Gâsdéouelle! n'v'chein la “dairy” qui passe et j'n'sis pon encouore levé! D'un saut y fus à bas de son lièt et ergardi par la fenêtre s'faisant: Muriel, ma fé chest les neuches! et il tait right èttout.

Ch'est d'même que nos gens qui pensaient d'aller ès neuches furent jouées.

L'pouor Fred du Colombi, qui avait été aidji à briser avec la “twin plough,” pensait d'être invité au fricot, mais couomme il n'savait rein en touot du compliot, il en est pouor l'regret d'aver maintchi un buan feed!

Hedley d'la Blianche Pierre et John et Ed. d'la Vallée ès Ormes, qui deux ou trais jours de d'vant avaient acaté une chèrge de cartouches pouor la titherie pouorront s'en servir pouor tither des moissons, car couomme l'pépée a Ada y dormaient encouore tandis que Moussieu l'Recteu, bein réveille par le carillon, présentait ses milleurs souhaits au nouviau couple. A tchi que mé j'offre touot bonheur et prospérité.

Quant ès siens qui sont mârris d'aver mantchi l'fricot, j'peux lus dithe que j'ai oui que quand vint un temps nous criyait qu'il n'y allait pon aver en tout viyant que chu tintamarre que j'avais oui ch'tait tchique chose qui avait tchès sus l'damper et nous eu une job a faithe l'feu s'prendre à chein que j'ai oui dithe.