Dê-ouôlez l'hôlouoge et dêcomptez l's heuthes!
Dêcachiz l's adgulles; qu'les b'sées lus dêpengent!
L'av'nîn va sus l'âge et l'achteu s'êtchoeuthe;
v'là l'vièr Papa Temps tchi tchait en êfange.

I' r'dote, raîque des miettes dé minnutes topinnent;
et sans sa note, la marche du temps sonne quas.
Les heuthes dêsonnent, dêsaîsonnées à sinne
dé jeu quandi qu'les cliochièrs pâssént lé pas.

Atout des âges, l'engrénage sé clioge;
l's adgulles lus piquent dans la vive chai
du grand hôlouogi tchi bouoge
d'un pas d'entèrrement, fraid
coumme pouaîson. L'hôlouoge
êp'sonne l'heuthe mais
qu'ou s'dêlouoge
et vaie
rouoge.