Dans ieunne des pus p'tites paraisses de Jerri, l'jour d'la visite du brancage, l' boss d'la paraisse pensi qui selon la buanne et ancienne couotume il tait d'san d'vé d'faithe préparé des rafraîchissements pouor tous nos grands d'la paraisse.
Couomme chu Connétable est pouor l'économie et qu'il n'aime pon les siens qui prennent deux ou trais d'goûts de litcheur de trop, y pensi qu'une fais d'bièthe f'rait l'affaithe, et pouor être seur que tout son monde fut content, y téléphoni pouor faithe envièth chu bèthe.
Nou l'y réponni qu'il n'y avait pon de bièthe et ly réponni d'apporter n'importe tchi!
L'sien qui r'chu chut ordre de son chef municipal s'empressa d'v'nir avec une chèrge de tchi rafraîchir nos grands d'la paraisse. Et ch'est qu'il y en avait pouor tous les goûts, même du champagne, mais pon d'bièthe, d'pis qu'il en avait pon siez ly.
Ver, du buan champagne et à buan marchi èttout, d'pis que n'v'la qui couote que quatre ou sièz sous la bouteille.
Vous voulez saver tchi sorte de champagne qu'nous peut aver pouor dithèt prix? Ch'tait du Kola Champagne! car j'l'vit mé-même sus ieunne des bouteilles. Et quand j'vos dis qu'il y en avait pour tous les goûts, j'en sis seur, viyant qu'il y avait d'la ginger-ale, du cherry-cider, du lime juice et un tas de tchi d'même.
Et bein pouor les siens qui aiment mus la bièthe que touot chunna, et qui étaient mârris, y faut dithe que ch'est l'coumitté du téléphone à tchi y faut envièth remontrance, viyant qu'ils avaient changi l'numétho au sien de l'hôtel de chutte paraisse, chein que l'boss n'savait pon, et n'v'la pouotchi que chest l'sien du bord d'ma niche du mont d'la Grève de Lecq qui r'chu l'message, l'sien à tchi nous avait erfuse licence de tavernier et tchi n'peux vendre que du kola-champagne, d'la ginger-ale et autres litcheurs fortes … en gaz!!
Au lieu d'avèr d'la gâche de neuches être m'nachi d'aver une remontrance est d'tchi qu'nous n'vais pon souvent et pouortant ch'est chein qu'en est pouor un grand d'une paraisse de l'Est.
L'pus marri d'l'affaithe ch'est Dash, l'grand pêtcheur du bord de Rozé, l'sien qui n'aurait pon voulu mettre les pids dans la chapelle ès vertes crabes.
Ch'tait son fils Sam, qu'nous peur ouithe sus la commune de Gorey d'viser couomme un prédicateur, ch'tait ly qui fut “jilted” couomme disent les angliais. L'pouor corps en fut si upsetté que j'crais que chutte fais l'barbi aurait pu ly couoper touot court les ch'veux qu'il aime bein aver assez longs pouor l'y garder l'co caud!
Pouor vos dithe, Sam était engagi à Jessi, la fille à Jack qui soigne des caniaux du marais et y lus décidites d'lus marrier.
Des s'mêle-de-touot, en apprenant chutte buanne nouvelle, allites trouver Moussieu l'Recteu et ly fites des accraithes car Moussieu l'Recteur s'fit un d'ver de raconter à Moussieu l'Doyen tout chein qu'nous ly avait dit.
Viyant tout chu fuss, nos jeunes gens pensites qu'il tait mus d'aller s'faithe marier au registre et l'autre Samedi matin ils taient dans l'office de l'enregistreur quand pan! pan! n'v'la tchicqu'un qui frappe. Et quand la porte s'ouvrit, tchi surprinse en viyant ieun des pus grands d'la paraisse!
Pouor lus faithe un présent de neuches?
Nennin car chu grand n'avait rein dans ses pouchettes ni dans ses mains. Y s'mit à d'viser et couommenchi par dithe qu'il avait grand r'gret de dérangi nos gens mais qu'il criyait être de son d'ver d'avertir Jessie...
Couomme la bus de la J.M.T. s'mint à passer juste à chu moment et que j'criyais que la bâtisse allait tchès sus ma vieille carcasse, j'm'sauvi bé vite et quand j'r'vint ès écoutes j'oui Jessie s'faithe qu'oulle prendrait du temps pouor reflêchi mais quand achteu l'mariage n'aurait pon lieu.
L'buanhomme Charles était fort marri et Sam èttout ly qu'avait deux certificats sus ly!!
Et ch'est à pids et non en carrose qu'ils rentrites siez ieux. J'sais bein que d'pis y sont rallés dans Hill Street mais ch'n'tait pon siez l'Enregistreur!
Caouain
1924
Viyiz étout:
