 La Vîsite Rouoyale à St. Hélyi en 2000 |
Auve touos les changements tch'ont tchulbuté nos moeurs et not' mode dé vivre, j'sis content d'vaie tch'i' y'a acouo des vielles couôteunmes comme La Visite Rouoyale tch'asseûthent ès anciens qué tchiquechose dé valeu du temps jadis êcliaithe acouo l'restant d'lus jours.
Oulle a ieu lieu dans deux d'nouos pâraisses à ches drein et dépis m'n arrivée en Jèrri, La Visite Rouoyale, comme en est la couôteunme touos l's ans.
Oulle est ieune des anciennes couôteunmes dé l'Île, comme nouos l'dit Charles Le Tchêne dans san livre "A Constitutional History of Jersey", tchi pathut en 1856. Moussieu L'Tchêne 'tait Juré-Justicier et Membre d's Êtats. En pâlant d'L'Assise d'Héritage, eune aut' vielle couôteunme, i' nouos dit tch'il 'tait probabl'ye qué certaines parties et cérémonies dé chutte couôteunme n'étaient p't-êt' pon nécessaithes souos les conditions d'la vie d'chu temps-la, mais tch'i' n'viyait autcheune raison pour aboli les vielles couôteunmes seulement pa'ce qu'il' 'taient anciennes et qué lus êffet n'tait pus d'împortance dans la vie d'san temps. J'sis absolûment dé s'n avis, car i' constituent un accord historique du temps pâssé auve lé temps actuel et auve nouot' heûtheuse alliance auve la Couronne, qu'ou fûsse dé Nouormandie ou d'Angliétèrre.
Ch't année, à La Visite Rouoyale à St Ouën, un précédent fut êtablyi quand, pour la preunmié fais duthant les siècl'yes dé l'existence dé La Visite, deux femmes, Madanme Phyllis Lucas, née Le Brun, la femme au Juge Max Lucas, et Madanme June Le Maistre, femme dé François Amy Le Maistre, Gentilhomme, et Présidente dé l'Înstitut des Femmes dé St Ouën, sèrvîdrent comme Voyeux.
L'honneu d'aver 'té la preunmié femme dé tout temps appelée pour êt' assèrmentée comme Voyeux appartcheint à Madanme Lucas. San nom fut l'deuxième nom appelé, lé preunmyi étant l'chein du Seigneur du Fief Haubert et Seigneurie de St. Ouën, Moussieu Philip Malet de Carteret.
Madanme Le Maistre fut la préchaine a êt' appelée, un grand honneu étout, et sans doute touos les Voyeux fûdrent assèrmentés en même temps. I' pathait, étout, qué ch'tait probabliément la preunmié fais qu'un Seigneur dé St. Ouën fûsse appelé pour êt' Voyeux. Né v'là don deux précédents, et un traisième éthait 'té êtablyi en honneu d'la pâraisse dé St. Ouën à ch't' occâsion si l'Juge Lucas, tch'avait à s'otchuper d'un aut' êvènement d'urgence dans tchi la présence d'un Juré Justicier 'tait néccssaithe, avait 'té présent sus l'Banc d'Justice, comme i' s'y attendait, quand les Voyeux fûdrent assèrmentés un homme parmi les Jurés Justiciers et sa femme du nombre des Voyeux.
Moussieur L'Tchêne nouos dit qu' après aver marchi les c'mins d'la pâraisse, un diner 'tait fourni par la Couronne pour les Mêssieux d'la Cour, et un autre pour les Voyeux. Chutte pliaisante couôteunme existe acouo, et l'Recteu, membre du Conmité pârouaissial des C'mins en vèrtu d'sa chèrge, est învité à mangi auve les Mêssieux d'la Cour. Mais l'Connêtabl'ye, les Voyeux et aut' fonctionnaithes dé la pâraisse ont lus diner à part. I' pathait, en tout cas, qué tout l'monde jouissent d'un raide bouan appétit à ch't' occâsion!
Chein tchi n'existe pus, dgia, est l'dîner tchi soulait êt' donné par la Couronne, auprès L' Assise d'Héritage, ès Gouvèrneux, Bailli et Jurés et aut' membres dé la Cour Rouoyale, et ès Seigneurs des fieux tchi daivent compathance à L' Assise, ouaithe qué les Seigneurs même ont un r'pas.
I' y'a deux pôssibilités à propos dé la provenance du titre Jèrriais dé Voyeux, ouaithe qué Moussieu L'Tchêne envisagit la fonction des assèrmentés comme étant dé "vaie" ou dé "dêcouvri" des empêchements dans les c'mins. Ieune des pôssibilités est l'êvolution du Latin "via" en "vaie" en Nouormand et en "voie" en Français, voulant dithe un c'min, lé vrai titre dé La Visite Rouoyale étant La Visite des Chemins Royaux, Voies et Sentes Publiques. Un exempl'ye du mot "vaie", "voie" ou "voye" est l'nom d'un clios, Lé Clios d'Ava la Vaie, ou Le Clos d'Aval la Voie (lé clios souos l'nivé du c'min), tch'est dans l's envithons du Coin à St Brélade.
Pouortant, l'originne la pus probabl'ye du mot Voyeux, et la cheinne souôt'nue par lé grand savant Nouormand l'Abbé Marcel Lelégard, tchi vînt m'visiter y'a eune tchînzaine, est du Latin "vicarius." Dé chu mot est v'nu les mots Nouormands ou Français "voieur", "voyeur" et "voyer", et les mots Angliais "vicar" et "vicarious". Ches'chin ont lé sens dé tchitch'un tch'est délégué, ou tch'est à agi pour un autre, dans l'cas Jèrriais pour l'autorité rouoyale, aut'fais ducale.
Né v'là don eune bouanne raison pour prêsèrver les vièrs titres Jèrriais comme Connêtabl'ye et l's empêchi d'êt' mênommés en les traduisant et les réduithant en Angliais modèrne.
Viyiz étout: