I'y a tchique temps, le Secrétaithe de l'Union des Fermiers vint à la boutique cherchi les cirtchulaithes annonçant les prix d'la main d'oeuvre et les dates pour l'inscription des tâcherons, que je li avions imprimé comme d'habitude.
Le papi, de tchi qu'une copie fut enviée à tous les membres, annonçait que nous pouvait boutchi ses ouvriers dépis le vingt-trais d'Mars jusqu'au treize Avri.
En liaisant ches détails-là je nos aperchûmes bain que l'Secrétaithe s'en allait aver d'la bésogne duthant chute periode-là, considéthant qu'i' y a passant siex chents contrats à remplyi, et qu'i' faut qu'i' saient tous entrés dans deux difféthents livres pour faciliter san travas quand il est en Bretagne, et je li fîmes la r'merque qu'i' s'en allait comme nou dit, “aver du fi a r'teurtre,” et que je n'viyaîmes pas comment qu'i' s'en allait en r'pather.”
“Oh, si fait,” i' nos raîponni, “tout dêpend sus nos Messieux. Si ch'est qu'i' vainnent au bureau aussi bouanne heuthe que possiblye et qu'la maintchi d'ieux vainnent dans les jours de s'maine à la pliaiche de v'nin tous ensemblye à la dernié minute et au Samedi, i' y a moyen de passer à travers.”
Tout chenna nos r'vint à l'idée Mêcredi, quand je vîmes Maît'e Dan Lêcaudey entrer à la boutique.
Jamais Dan ne vaint en ville à mains qu'i' n'ait tchique affaithe spéciale et je nos imaginîmes sans doute qu'il 'tait v'nu tout exprès pour boutchi ses Bretons, li qui fait v'nin tréjous la même djaîngue.
Et je li dîmes comme chenna, “j'pense bain qu'ous avez 'té à l'Union, Maît'e Dan.”
“A l'Union? Et tchi faithe? Oh! L'diantre, v'là tchi m'fait penser, j'n'ai pas oquo payi ma souscription!”
“Et vos dêfouisseurs! Ou savez bain que ch'est chin l'temps pour les boutchi!”
“Mais!” I' s'écriyi, “mes patates ne sont pas oquo bouannes à dêfoui!”
Sous attendez qu'i' saient bouannes Maît'e Dan, criyous que par chu temps-là, i' s'sa un mio tard de vos en otchuper,” je li raîponîmes.
“Eh bain, ch'est vrai, je n'y avais pas oquo pensé, i' faudra que j'êcrive à Joseph iun d'ches jours.”
Quand i' fut hors le chef me dit “Caouain, va jusqu'au bureau d'l'Union vaie comment que l'affaithe va et d'mande au Secrétaithe si ch'est qu'i' y en a hardi comme Maît'e Dan Lêcaudey.”
Quand j'arrivi là-bas je trouvi deustrais femmes de fermi à inscrithe lus gens.
Ieun de ieux m'dit “Oh bon Caouain, et tch'est qu'tu ès à faithe ichin, té? T'es-tu mins à craître des patates? Tu n'as pas tout ch't embarras ichin té, i' n'te faut pas d'Bretons!”
“Nan dja Missice,” je li raîponni, “mais j'vaie qu'ous avez l'avis de v'nin faithe vot'e bisnesse dans la s'maine, pour êviter la “crowd” du Samedi.”
“Ah vaithe!” Ou raîponni, “j'apprins ma léçon l'année passée, je fut d'but dans l'allée quâsiment une heuthe à attendre pour man tou et je mantchi ma “bus.” Annièt je n'ai pas 'té ichin chinq minutes. Et pis tchi difféthence avec la Sécrétaithe!
Sus la s'maine ch'est un vrai pliaisi d'aver une conversation avec li, mais au Samedi quand l'office est pliaine de monde qui veulent tous être servis d'un temps, il est d'une humeur de tchan!”
Quand ou fut horte je d'mandi à George comment que l's affaithes allaient.
“Oh pas trop mal,” i' m'dit, “il en est v'nu déjà un bouan nombre.”
Je li d'mandi de m'laissi vaie le système sus tchi que tout chenna se travaillait et je fus réelement êtonné de toutes les formalités qui sont exigées par les autorités, le travas qu'est imposé sus l'sécrétaithe et la responsabilité de tchi qu'il est chergi.
Opprès avé correspondu avec les autorités françaises afin d'obtenin la permission officielle de faithe venin les ouvriers i' faut qu'il envie un feuilleton à neuf chents membres de l'Union lus donnant touos les détails quant ès prix des tâches, etc, et les invitant de v'nin au bureau inscrithe lus gens. Les siens qui n'en connaissent pas, ou qui veulent changi d'équipe lus fient sus l'sécrétaithe pour lus trouver chein qui lus faut et i' s'attendent sans doute à aver du bouan monde.
A propos de chennechin je pus examiner envithon chent-chinquant lettres qu'arrivent de toutes parts de la Bretagne et ailleurs sollicitant des tâches. Eh bain, le Sécrétaithe prend des renseignements ouest qu'i' peut, pour s'asseuther tch'est qu'sont les siens qui sont dignes d'empliai et il en garde une liste. Comme il est nécessaithe que la pus grande partie d'ches lettres-là demandent une raîponse, ou pouvez craithe qu'i' y a d'la correspondance à faithe.
Afin que les ouvriers saient informés des gages que nous propose de lus donner, et des dates estchelles que les membres du Syndicat sont pour passer dans les difféthentes contrées, le Sécrétaithe est tenu d'en informer tchinze jours devant, pas mains de quatre-vingt-chinq Maîres de Communes.
Le Sécrétaithe et les treis messieux qui vont avec li, visitent quarante-six villes et villages dans les Côtes-du-Nord et l'Morbihan et duthant lus parcours remplissent et font signer enviethon treis mille chinq chents contrats.
Ou verrez don que lus tâche n'est pas justement le picnique qui y a des hens qui lus imaginent.
Opprès que j'eus ieu toute la routine explitchie, je n'pus pas m'empêchi d'admither la perfection du système et j'en féliciti le Sécrétaithe.
“Oh!” Qu'i' m'dit, “ch'est pas mé qui faut louangi, il est vrai que j'ai changi tchiques petits détails, mais tout chenna fut organisé en premier lieu par man prédécesseur, Paul Perrédès, qui du aver des diffitchultés colossales les premièthes années. Je sis raique à suivre la piste qu'il a tracé.”
“Ch'est égal,” je li dis, “tu as là une job qui n'est pas facile.”
“Je l'admets,” i' m'dit, “mais nos fermiers peuvent l'alligi hardi en v'nant aussi bouanne heuthe que pôssiblye faithe lus inscriptions, et ch'est tout à lus intéthêt. Je voudrais Caouain, que tu êcrithais un articlye au sujet pour tâchi de les en persuader.”
Et je li promins de faithe de man mus.
A bon entendeur, salut!
Caouain
1929
Viyiz étout: