Mé v'chîn à m'assiéthe en d'vant d'l'âtre, man tchian sus mes g'nouors, auprès aver pâssé eune raide bouanne journée dans la boulangu'thie à faithe du pain et des galettes à vrai.
La boulangu'thie à Trodez a 'té èrpathée, et l'idée est d'èrquémenchi à boulandgi dé temps en temps tout à fait à la vielle mode. À vaie lé roui sus la p'tite porte (lé temps pâssé ch'tait l'êtoupe ou l'êtoupon) du grand fou j'dithais qu'y'avait au mains d'souaixante ans, p't'-êt' pus, qué l'fou n'avait pas 'té fait sèrvi.
Nou n'a pon autcheune idée du travas qu'i' y'a à faithe du pain coumme chonnechîn à la vielle mode. Preunmiéthement, i' faut un tas d'bouais, du bouais qui n'a pas ieu autchun traitement chimique. J'ai bein d'la chance d'aver un bieau-fis qu'est tchèrpentchi et qui m'apporte du bouais dé temps en temps.
I' faut caûffer l'fou toute la journée lé jour dévant vouler boulandgi, et pis sé l'ver dé bouanne heuthe lé d'main au matîn pouor ralleunmer l'feu. Par lé temps qu'la pâte est faite, l'vée et pêtrie, lé fou est hardi caud.
J'taîmes siex pèrsonnes et trais d'mes p'tits êfants à faithe lé pain, avec l's expèrts Graham Robins et David Bishop à nos aîdgi pouor nouot'e preunmié fais. Nou met les pains sus des fielles dé caboches et pis dans eune armouaithe caude pouor les faithe l'ver acouo eune fais dévant les mettre au fou.
nou fait les pains et les met sus eune fielle dé chour sus la plianche
Mais d'vant chenna i' faut haler les chendres dé d'dans l'fou atout un rabot et pis netti lé fond du fou avec eune patouoille, un torchon ou pouque bein mouoilli amathé au but d'un long bâton. La chendrile vole un mio mais l'fond du fou est bein propre auprès.
J'fîmes vîngt-huit pains d'eune livre châque et pus d'chent galettes à vrai. Auprès tout chu travas j'taîmes prêt à gouôter lé produit avec du bouân beurre dé Jèrri, un morcé d'fronmage et, bein saïeux, eune vèrrée d'vîn. Lé vèrdi? - excellent!
Eh bein, né v'là assez d'excitement pouor un jour. Lé feu dans l'âtre c'menche à s'dêteindre ouaithe qué l'ticl'ye chante sus l'trépid. Vé-t'en, man p'tit tchian, j'm'en vais faithe eune tâssée d'thée et pis j'allons nos couochi!
Ursula Taylor
Viyiz étout: